د ځايي رسنیو په وینا، په انټرنیټ کې خپاره شوي انځورونه داسې پاتې شوني ښيي چې ګومان کېږي د امریکا د MQ-9 Reaper بې پیلوټه الوتکې او د هغې د وسلو پورې اړه لري.

ځايي رسنیو د دوشنبې په ورځ راپور ورکړ چې په یمن کې حوثي ډلې د دغه هېواد په ختیځ، مأرب ولایت کې د امریکا یوه MQ-9 Reaper بې پیلوټه الوتکه نسکوره کړې ده.

د «ډیفنس لاین»  په څېر ځايي رسنیو ویلي چې د مأرب ښار اوسېدونکو په فضا کې د سختو چاودنو غږونه اورېدلي او د ښار په لوېدیځ کې یې له «صروواح» سیمې څخه د هوايي دفاع د یوه توغندي توغول کېدل لیدلي، چې وروسته په هوا کې دوه چاودنې وشوې.

د راپورونو له مخې، په ټولنیزو رسنیو کې فعالانو داسې انځورونه خپاره کړي چې ښيي د امریکايي بې پیلوټه الوتکې او د هغې د توغندیو ټوټې د «وادي» ولسوالۍ په ختیځه دښته کې پرتې دي.

ډیفنس لاین ویلي چې په خپرو شویو انځورونو کې لږ تر لږه د AGM-114R9X "Ninja" په نوم د دوو توغندیو پاتې شوني لیدل کېږي؛ دا د «هیلفایر» هوا څخه ځمکې ته د ویشتونکي توغندي یو بدل شوی ډول دی چې د دقیقو بریدونو لپاره ډیزاین شوی.

دغې رسنۍ زیاته کړې، انځورونه تاییدوي چې دا پاتې شوني د امریکا د MQ-9 Reaper بې پیلوټه الوتکې دي. دا هغه ډول بې پیلوټه الوتکې دي چې امریکا یې په یمن کې د څارنې او ترهګرۍ ضد عملیاتو لپاره کاروي.

تر اوسه حوثي ډلې یا د امریکا پوځ د دې پېښې په اړه رسماً څه نه دي ویلي.