"چارواکي وايي د مخمور په سیمه کې د پیشمرګه او فرانسوي ځواکونو پر یوې ګډې روزنیزې اډې د بې پیلوټه الوتکې (ډرون) برید شوی، چې له امله یې یو شمېر فرانسوي سرتېري ټپیان شوي دي.
د فرانسې ولسمشر ایمانویل مکرون تایید کړه چې په دې برید کې د ارناوډ فریون په نوم یو جګپوړی فرانسوي افسر وژل شوی دی. مکرون پر فرانسوي ځواکونو برید «د نه منلو وړ» وباله، د فریون خدمت ته یې درناوی وکړ او ژمنه یې وکړه چې فرانسه به د خپلو پرسونل د ساتنې لپاره مناسب ځواب ورکړي.
یوه چارواکي وویل چې اووه فرانسوي سرتېري هغه مهال په ډرون برید کې ټپیان شول چې د ترهګرۍ ضد روزنه یې ورکوله. د کردستان سیمه ییز حکومت د قوماندان سیروان بارزاني په وینا، دا برید د مخمور په سیمه کې د پیشمرګه او فرانسوي ځواکونو پر یوې ګډې اډې شوی دی.
تر اوسه په دقیقه توګه معلومه نه ده چې دا ډرون له کوم لوري راغلی و. سیروان بارزاني سیمه ییزو رسنیو ته وویل چې دا ډرون برید پر هغه پوځي روزنیز ډګر شوی چې د فرانسوي مشاورینو لخوا کارول کېده. هغه زیاته کړه: «هلته میشت فرانسوي سرتېري له جګړې یا کړکېچ سره هیڅ تړاو نه لري. دوی یوازې پوځي مشاورین دي چې په قانوني ډول په عراق کې شتون لري.»
بارزاني دا پېښه یو «غیر عادلانه ترهګریز عمل» وباله او د عراق له حکومت څخه یې وغوښتل چې د ورته بریدونو مخه ونیسي.
تر دې وړاندې د اربیل والي اومیډ خوشناو ویلي وو چې په برید کې شپږ فرانسوي سرتېري ټپیان شوي او څلور یې روغتون ته وړل شوي دي. خوشناو ځايي رسنیو ته وویل چې برید په مخمور کې پر «شپږم محور» شوی، چېرته چې فرانسوي ځواکونه له پیشمرګه جنګیالیو سره یوځای ځای پر ځای دي. هغه زیاته کړه چې په دې پېښه کې پیشمرګه ځواکونو ته هیڅ ډول زیان نه دی رسېدلی."
