د اوکراین ولسمشر ادعا کوي چې روسیه دا مهال مسکو، والډای ښارګوټي او د کرچ پل ته (کوم چې کریمیا له اصلي خاورې سره نښلوي) ډېر هوايي دفاعي تهیزات لېږدوي.
د اوکراین ولسمشر ولادیمیر زیلینسکي ویلي، ده د هیواد استخباراتو او اردو ته لارښوونه کړې چې د هغو روسي تاسیساتو په وړاندې "مخکې له مخکې اقدام" وکړي چې په دې څلور کلنه جګړه کې کارول کېږي.

زیلینسکي د چهارشنبې په ماښام په خپله ویډیويي وینا کې وویل چې د دفاعي استخباراتو له مشر اولېګ ایواشچینکو څخه یې د اوکراین لخوا د روسیې د انرژۍ پر تاسیساتو د بریدونو په اړه معلومات ترلاسه کړي دي. هغه ادعا وکړه چې د اوکراین استخباراتو ځینې داسې "داخلي روسي اسناد" ترلاسه کړي چې ښيي دا بریدونه د مسکو لپاره خورا "دردناک" ثابت شوي دي.

هغه په ډاګه کړه چې اوکراین یو شمېر داسې اهداف ویشتي چې د جګړې له لومړۍ کرښې څخه تر ۱۲۰۰ کیلومتره ډېر لیرې دي، او په دې بریدونو کې د روسي پوځ د مخابراتو مرکزونه هم په نښه شوي دي.

زیلینسکي وویل: "ما خپلو استخباراتو او اردو ته لارښوونه وکړه چې د هغو تاسیساتو په وړاندې مخکې له مخکې اقدامات وکړي چې روسان یې د جګړې د پراخولو لپاره کاروي."

نوموړي ادعا وکړه چې مسکو دا مهال د خپلې پلازمېنې ترڅنګ، والډای ښارګوټي او د کرچ پل ته ډېر دفاعي تجهیزات لېږدوي. د کرچ پل په ۲۰۱۴ کال کې د روسیې لخوا د کریمیا له الحاق وروسته د دې لپاره جوړ شو چې دا ټاپووزمه د روسیې له اصلي خاورې سره ونښلوي.

زیلینسکي دا ادعا هم وکړه چې د روسیې له ۶۰ څخه ډېرې سیمې د تېلو له کمښت سره مخ دي. د روسیې د تېلو پر چاڼځایونو د اوکرایني ډرون بریدونو له امله یو شمېر تاسیسات د بیارغونې لپاره تړل شوي، چې له امله یې مسکو د کورني بازار د ثبات لپاره په ځینو سیمو کې پر تېلو محدودیتونه لګولي دي.

د راپورونو له مخې، دا محدودیتونه په تیو مین (Tyumen) او تاتارستان په څېر سیمو کې لګول شوي دي. په کریمیا کې روسي چارواکو اعلان کړی چې عامو خلکو او خصوصي سوداګریو ته د تېلو پلور په بشپړ ډول درول شوی او موجود تېل یوازې د اړینو عامه خدماتو لپاره ساتل کېږي. د روانې میاشتې په پیل کې د اوکراین پوځ ادعا کړې وه چې د روسیې ۱۶ مهم چاڼځایونه یې ویشتي او د هغوی د تولید ۳۰ سلنه ظرفیت یې له کاره اچولی دی.