په تورکیه کې د امریکا سفیر د ایف-۳۵ جنګي الوتکو په پروګرام کې د انقرې د
ګډون پر سر روانه اوږدمهاله شخړه بې ځایه بللې او د هغې د ژر تر ژره حل کېدو
غوښتنه یې وکړه. هغه ټینګار کړی چې دا حل لاره به د ناټو تړون پیاوړی کړي، چې
دواړه هېوادونه یې پخواني غړي دي.
ټام بارک، چې د سوریې لپاره د امریکا د ځانګړي استازي په توګه هم دنده ترسره کوي، د چهارشنبې په ورځ "فاکس نیوز ډیجیټل" ته وویل چې دا کړکېچ یو ډیپلوماټیک پرمختګ ته اړتیا لري. هغه تکرار کړه چې تورکیه یو حیاتي متحد پاتې شوی، چې د امریکا د کلیدي تاسیساتو کوربه توب کوي، د ناټو په ماموریتونو کې ونډه اخلي او د ګډو ګواښونو مخه نیسي.
بارک وویل چې د روسیې د S-400 هوایي دفاعي سیسټم د پیرلو له امله د ایف-۳۵ له
پروګرام څخه د تورکیې ایستلو په بې ځایه توګه دوه اړخیزې اړیکې ترینګلې کړې
دي، په داسې حال کې چې ګټه یې یوازې روسیې ته رسېدلې ده.
هغه زیاته کړه: "د S-400 مسله د (دقیقې ډیپلوماسۍ) له لارې په څو
میاشتو کې حل کېدای شي." هغه د بهرنیو چارو د وزیر مارکو روبیو هڅو او د ولسمشر
ډونالډ ټرمپ او د تورکیې د ولسمشر رجب طیب اردوغان ترمنځ اړیکو ته په اشارې سره وویل چې دا کار شونی دی.
د امریکا په کانګرس کې د اندېښنو، په ځانګړې توګه د سناتور ریک سکاټ د نیوکو په
ځواب کې، بارک وویل چې هر ډول حل لاره به د ۲۰۲۰ کال د ملي دفاعي واک ورکولو قانون له ۱۲۴۵ برخې سره بشپړ مطابقت ولري.
هغه وویل: "دا پدې مانا ده چې د روسیې د S-400 سیسټم د ملکیت او فعالیت د بندولو
تایید وشي." هغه زیاته کړه چې د دفاع او بهرنیو چارو وزارتونو رسمي تصدیقونه به
دا تایید کړي چې د ایف-۳۵ حساسو ټیکنالوژیو ته هیڅ خطر نشته. بارک ټینګار وکړ: "د
امریکا په امنیتي معیارونو کې به هیڅ 'لنډه لار' (معامله) نه وي."
د ایف-۳۵ په سیسټم کې د تورکیې رول:
بارک وویل چې یو پرمختګ نږدې دی او اشاره یې وکړه چې په ایف-۳۵ پروګرام کې د تورکیې د رول بیا رغول، د ناټو ترمنځ د همغږۍ پیاوړتیا، د امریکا صنعت ته وده ورکول او له روسیې څخه د فشار د وسیلې اخیستل هغه څه دي چې ډېر ژر به ترسره شي.
نوموړي دا تګلاره د ټرمپ له بهرني سیاست سره سمه وبلله او ویې ویل: "دا د ټرمپ په
طرز یو کلاسيک معامله ده: قانون پلي کول، زموږ د ټیکنالوژۍ ساتنه او د هغو
اتحادونو بیا رغول چې د امریکا ځواک زیاتوي."
هغه په پای کې وویل: "موږ په 'ځواکمنه سوله'، د حقایقو په صادقانه ارزونه او د هغو
پایلو په ترلاسه کولو باور لرو چې د امریکا ګټې خوندي کړي، پرته له دې چې امریکا
په بې پایه شخړو کې ښکېل کړي."
