د روسیې یوه لوړپوړي امنیتي چارواکي د پنجشنبې په ورځ وویل، روسیه د افغانستان له واکمنو طالبانو سره یو "بشپړ او هر اړخیز شراکت" رامنځته کوي او د سیمې نور هیوادونه هم هڅوي چې له کابل سره همکاري پراخه کړي.
روسیه تېر کال لومړنی هیواد شو چې په رسمي ډول یې د طالبانو اسلامي حکومت وپېژانده؛ هغه حکومت چې د ۲۰۲۱ کال په اګست کې له ۲۰ کلنې جګړې وروسته د متحده ایالاتو په مشرۍ د ځواکونو د غیرې منظم وتو وروسته واک ته ورسېد.
انټرفاکس خبري اژانس د روسي چارواکي سرګي شویګو له قوله ویلي چې له کابل سره همکاري د سیمې د امنیت او پراختیا لپاره حیاتي ده.
د روسیې د امنیت شورا منشي شویګو، وویل چې مسکو له طالبانو سره یو "عملي ډیالوګ" رامنځته کوي چې په کې امنیت، تجارت، کلتور او بشري مرستې شاملې دي.
هغه دا څرګندونې د شانګهای د همکارۍ سازمان (SCO) د غړو هیوادونو له خپلو سیالانو سره په کتنه کې وکړې. په دغه ۱۰ کسیز سازمان کې چین، هند، ایران، پاکستان او د پخواني شوروي اتحاد یو شمیر غړي هیوادونه شامل دي.
شویګو زیاته کړه چې د شانګهای د همکارۍ سازمان باید له افغانستان سره خپله د تماس ډله بیا فعاله کړي.
طالبان په ۲۰۰۳ کال کې د روسیې له خوا د یوه ترهګریز خوځښت په توګه منع شوي وو، خو دا بندیز د ۲۰۲۵ کال په اپریل کې لیرې شو. روسیه له کابل سره کار کولو ته اړتیا ویني ځکه چې دا هیواد د هغو وسله والو اسلامپالو ډلو له خوا له لوی امنیتي ګواښ سره مخ دی چې له افغانستان څخه نیولې تر منځني ختیځ پورې په یو شمېر هیوادونو کې میشتې دي.
