د ښي اړخي افراطي وزیر اتمار بن ګویر په خپلو خبرو کې څرګنده کړه: "یوه 'ترهګر' د ۱۸۰ اسرائیلیانو د وژلو په موخه د الوتکې د راغورځولو هڅه وکړه."

د ای‌اېف‌پي  او اسرائیلي رسنیو لخوا د مسافرو د څرګندونو له مخې، الوتکه د دوو پیلوټانو ترمنځ له هغې شخړې وروسته سعودي عربستان ته په ناسته اړ شوه چې یوه، بل په چاقو وواهه.

په الوتکه کې دوه ټپیان شوي پیلوټان روغتون ته ولېږدول شول
راپورونه وايي چې د سعودي عربستان د تبوک په هوايي ډګر کې د فلاي دوبۍ په ناسته کړې الوتکه کې ټپي شوی مشر پیلوټ (کپتان) او مرستیال پیلوټ روغتون ته لېږدول شوي دي.

د تبوک هوايي ډګر د اعلامیې له مخې، د فلاي دوبۍ الوتکې د سیمه ییز وخت په ۰۹:۴۵ دقیقو په خوندي توګه ناسته وکړه.

په اعلامیه کې ویل شوي چې د مشر پیلوټ او مرستیال پیلوټ د ټپي کېدو له تثبیت وروسته، دواړه روغتون ته انتقال شوي دي.

د هوايي ډګر په اعلامیه کې نور جزییات نه دي ورکړل شوي.

څه پېښ شوي وو؟

اسرائیلي رسنیو راپور ورکړی و چې له دوبۍ څخه تل ابیب ته روانې الوتکې د اردن په هوايي حریم کې د الوتنې پر مهال لومړی د عمومي بېړني حالت کوډ "7700" او بیا د الوتکې د تښتونې کوډ "7500" لېږلی و.

۱۲م چینل (Kanal 12) تلوېزیون خبر ورکړی و چې دا پېښه د مسافر وړونکې الوتکې د دوو پیلوټانو ترمنځ د شخړې له امله رامنځته شوې ده.

ویل شوي وو چې د شخړې پر مهال یوه پیلوټ خپل هوش له لاسه ورکړی او په همدې ترڅ کې په تېروتنې سره د بېړني حالت کوډ لېږل شوی دی.

همدارنګه راپور ورکړل شوی چې د هغې ادعا په اړه څېړنې روانې دي چې ګواکې یوه پیلوټ د ځانوژنې او الوتکې د راغورځولو هڅه کوله، او اسرائیلي مسافرو یې د مخنیوي هڅه کړې ده.

یوه جګپوړي اسرائیلي چارواکي ۱۲م چینل ته په خبرو کې ادعا کړې وه چې په تل ابیب کې دا پېښه د یوه ترهګریز برید په توګه ارزول شوې او "په وروستۍ شېبه کې د یوه ستر ناورین مخه نیول شوې ده".

په وروستي خبر کې د هغو معلوماتو یادونه شوې چې ګواکې مرستیال پیلوټ چې ویل کېږي د عمان تبعه دی، مشر پیلوټ څو ځله په چاقو وهلی دی، او ادعا شوې چې د الوتکې عملې او یو شمېر مسافرو د کاکپیټ (د پیلوټ د کابین) دروازه ماته کړې او دننه ننوتل ترڅو د مرستیال پیلوټ مخه ونیسي.

سربېره پر دې، ادعا شوې چې د کاکپیټ خونې ته په ننوتونکو مسافرو کې ځینې پیلوټان هم وو او په دې توګه د الوتکې د راغورځېدو مخه نیول شوې ده.