پداسې حال کې چې د ټرمپ تناقضات د جګړې ابهام زیاتوي؛ ایران پر خلیج د ډرون بریدونو ته دوام ورکوي
حکومتونو د جګړې د اغېزو کمولو لپاره یو لړ اقدامات اعلان کړل، چې په کې بهر ته د رسمي سفرونو کمول او په ټولو سکتورونو کې د تېلو د مصرف محدودول شامل دي.
ایران د سه شنبې په ورځ د سعودي عربستان او کویت په لور بې پیلوټه الوتکې (ډرون) وتوغلې؛ په ورته وخت کې د امریکا ولسمشر ډونالډ ټرمپ د جګړې د دوام د مودې په اړه ضد او نقیض پیغامونه واستول، چې دې کار هغه ناڅرګندتیا زیاته کړه چې په بازارونو کې د بدلونونو لامل کېږي.

د سعودي عربستان د دفاع وزارت خبر ورکړی چې د دغه هېواد په تېلو غني ختیځه سیمه کې یې ډرون الوتکې له منځه وړي دي. په کویت کې هم ملي ګارډ اعلان وکړ چې د هېواد په شمالي او سویلي برخو کې یې ځینې ډرون الوتکې راغورځولې دي.

د متحده عربي اماراتو د دفاع وزارت هم ویلي چې هوايي دفاعي سیسټم یې له ایران څخه توغول شوي توغندي او ډرون الوتکې په فعال ډول شنډې کړې دي. وزارت پر اېکس (X) ټولنیزه شبکه کې لیکلي: «د اماراتو هوايي دفاع دا مهال د ایران له لوري د توغندیو او ډرون الوتکو له ګواښونو سره مبارزه کوي.»

پر ګاونډیو خلیجي هېوادونو د ایران وروستي بریدونه وروسته له هغه وشول چې ټرمپ د دوشنبې په ورځ ناوخته جمهوري غوښتونکو وکیلانو ته وویل چې جګړه به احتمالا «یو لنډ کمپاین» وي؛ خو څو ساعته وروسته یې په ټولنیزو رسنیو کې ګواښ وکړ چې که ایران د هرمز تنګي د تړلو هڅه وکړي، امریکا به خپل بریدونه په ډراماتیک ډول ډېر زیات کړي.

د ټرمپ د خبرو په ځواب کې، د ایران دولتي رسنیو د سپاه پاسداران د ویاند علي محمد ناییني له قوله ویلي: «ایران به پرېکړه کوي چې جګړه کله پای ته ورسېږي.»

مصر د تېلو د بیو له لوړېدو سره سم د سون توکو بیې لوړې کړې
په ورته وخت کې، په منځني ختیځ کې د جګړې له امله د تېلو د نړیوالو بیو په لوړېدو سره، مصر د سه شنبې په ورځ د سون توکو بیې تر ۱۷ سلنې پورې لوړې کړې. د قاهرې د چارواکو په وینا، د ډیزلو بیه چې په عامه ترانسپورت کې ډېر کارول کېږي، ۱۷ سلنه لوړه شوې. همدارنګه د ۹۲ اوکتان پټرولو بیه ۱۵ سلنه او د ۹۵ اوکتان ۱۴ سلنه لوړه شوې ده.

جګړې مصر سخت ځپلی دی. مصر چې تر ټولو نفوس لرونکی عربي هېواد دی، په لویه کچه پر وارداتي تېلو تکیه لري. د مصر پونډ د دوشنبې په ورځ د امریکايي ډالر پر وړاندې ۵۲ ته راښکته شو چې دا یو ریکارډ ټیټه کچه ده. د جګړې د اغېزو کمولو لپاره، حکومت یو لړ تدابیر اعلان کړل چې په کې د رسمي بهرنیو سفرونو کمول او د تېلو د مصرف محدودول شامل دي.

ټرمپ: که ایران د تېلو ټانکرونه ودروي، نو له سخت برید سره به مخ شي
د امریکا ولسمشر ژمنه وکړه چې که ایران په هرمز تنګي کې د تېلو د لېږد مخه ونیسي، نو پر وړاندې به یې سخت پوځي ګامونه پورته کړي. ټرمپ په ټولنیزو رسنیو کې ولیکل: «که ایران په هرمز تنګي کې د تېلو د جریان د بندولو لپاره کوم کار وکړي، د متحده ایالاتو لخوا به تر هغه شل برابره سخت ووهل شي چې تر اوسه وهل شوي دي.»

هغه زیاته کړه: «موږ به داسې اهداف له منځه یوسو چې په اسانۍ ویجاړېدای شي او د یو هېواد په توګه د ایران بیا رغول به نږدې ناممکن کړي — پر هغوی به مرګ، اور او غصه حاکم شي — خو زه هیله او دعا کوم چې داسې ونه شي!»

ولسمشر وویل چې د هغه دا ګواښ د هغو هېوادونو لپاره یو «ډالۍ» ده چې د منځني ختیځ پر تېلو تکیه لري، چې په کې چین هم شامل دی.