روسي چارواکي وايي، د جګړې د پای ته رسولو لپاره د نوي پړاو ډیپلوماټیکو خبرو اترو په درشل کې، په کریمیه کې د وروستیو وختونو په یو تر ټولو اوږده ډرون برید کې یو ماشوم ټپي شوی دی.
د روسیې د دفاع وزارت د سه شنبې په ورځ وویل چې د هېواد د بېلابېلو سیمو، تورې بحیرې او ازوف بحیرې پر سر یې ۱۵۱ اوکرایني ډرون الوتکې ویشتلي دي.
د سواسټوپول والي، میخایل رازوزهایف، وویل چې دا یو له تر ټولو اوږدو بریدونو څخه و او د لومړنیو معلوماتو له مخې یو ماشوم په کې ټپي شوی دی.
ټاکل شوې چې دواړه لوري نن (سه شنبه) په جنیوا کې د امریکا په ملاتړ د خبرو اترو نوی پړاو پیل کړي. له دې وړاندې د سپینې ماڼۍ په منځګړیتوب دوه پړاو خبرو کومه نتیجه نه وه ورکړې.
که څه هم روسیه د اوکراین شاوخوا ۲۰ سلنه خاوره په واک کې لري، خو د (AFP) د تحلیل له مخې، اوکرایني ځواکونو تېره اونۍ د چهارشنبې او یکشنبې ترمنځ ۲۰۱ مربع کیلومتره خاوره بېرته نیولې ده.
