فرانسې د اسلامي دولت ډلې له یوې څانګې سره د اړیکو په تور یو افغان نیولی دی
د ترهګرۍ ضد څارنوالانو د شنبې په ورځ وویل چې په فرانسه کې یو شل کلن افغان وګړی، چې د اسلامي دولت ډلې له یوې څانګې سره د اړیکو شک پرې کېده، نیول شوی دی.
د ترهګرۍ ضد ملي څارنوالۍ وویل چې پر دغه کس په یوه جنایتکاره ترهګریز سازمان کې د ګډون او د ترهګریزو کړنو د تمویل تور لګول شوی دی.
دغه تورن کس، چې تېره اوونۍ په لیون ښار کې نیول شوی و، تر محاکمې مخکې توقیف ته لېږل شوی دی.
د ترهګرۍ ضد ادارې ویلي: "هغه په ښکاره ډول جهادي ایډیالوژي مني، او شک کېږي چې د داعش خراسان څانګې سره یې اړیکې لرلې."
څارنوالۍ زیاته کړه، پر دغه کس شک کېږي چې "پیسې یې لېږلې" او "د دغې ترهګرې ډلې د تبلیغاتو" په ژباړه او خپرولو کې یې مرسته کړې ده.
د اسلامي دولت خراسان څانګه، چې په افغانستان کې د دغې جهادي ډلې څانګه ده، په پاکستان او د منځنۍ اسیا په پخوانیو شوروي هېوادونو لکه ازبکستان کې هم فعالیت کوي.
دغه ډله په افغانستان او روسیه کې د خونړیو بریدونو مسؤله ده، چې په کې د ۲۰۲۴ کال په مارچ میاشت کې د مسکو پر یوه کنسرت تالار برید هم شامل دی، چې ۱۵۰ کسان په کې ووژل شول.
د فرانسوۍ ورځپاڼې "لي پاریزین" د راپور له مخې، دغه افغان چې څو کاله وړاندې فرانسې ته تللی و، د فرانسې د کورنیو استخباراتو ادارې افسرانو له خوا هغه مهال ونیول شو چې نوموړی له وړاندې لا په لیون ښار کې په یوه اداري توقیف ځای کې و.
لي پاریزین ویلي چې دغه تورن کس، چې له وړاندې لا د ترهګرۍ د ستاینې په تور تر څېړنو لاندې و، په ټیک ټاک او سنیپ چټ ټولنیزو شبکو کې جهادي تبلیغات سمول او خپرول.
په تېره یوه لسیزه کې پر فرانسه د اسلامپالو بریدګرو له خوا په پرله پسې ډول بریدونه شوي، چې ډېری وخت دا بریدونه د هغو کسانو له خوا شوي چې له القاعده یا اسلامي دولت (داعش) ډلې څخه یې الهام اخیستی وي.
