د اوکراین یو لوړپوړي چارواکي ویلي چې د دغه هیواد په سویل کې پر یوې سوداګریزې کښتۍ او په توره بحیره کې پر دوو نورو کښتیو د روسیې په بریدونو کې د یوې کښتۍ د کپتان په ګډون درې تنه وژل شوي دي.
د اودیسا سیمې د پوځي ادارې مشر، اولیګ کیپر وویل: "ماښام مهال، دښمن د اودیسا سیمې پر بندري تاسیساتو یو نوی برید وکړ. د دغه برید پر مهال، یوې بې پیلوټه الوتکې (ډرون) پر یوې ملکي کښتۍ چې د مارشال ټاپوګانو بیرغ پرې و، برید وکړ."
نوموړي د سه شنبې په ورځ په ټیلیګرام کې وویل چې په کښتۍ کې اور ولګېد او له بده مرغه دوه تنه پکې ووژل شول.
تر دې وړاندې کیپر ویلي وو چې په توره بحیره کې دوه نورې سوداګریزې کښتۍ، چې د تنزانیا او لیبریا بیرغونه یې درلودل، هم ویشتل شوې دي. هغه زیاته کړه: "د دغه برید په پایله کې د یوې کښتۍ کپتان ووژل شو."
د هغه په وینا، د کښتۍ نور ۱۱ غړي ژغورل شوي او له سیمې ایستل شوي دي، چې له ډلې یې درې تنه ټپیان دي.
