د تورکیې ولسمشر:د بشري حقونو نړیوال ارزښتونه په غزه کې د اسرائیلو د نسل وژنې له امله 'سخت زیانمن شوي

د تورکیې ولسمشر: د بشري حقونو نړیوال ارزښتونه په غزه کې د اسرائیلو د نسل وژنې له امله 'سخت زیانمن شوي

د تورکیې ولسمشر اردوغان، د بشري حقونو د ورځې په مناسبت، په غزه کې د اسرائیلو وحشیانه جګړه او ورانۍ وغندلې، ویې ویل چې نړیوال ارزښتونه کمزوري کېږي او د سولې د ټینګښت او د دې تړانګې د بیارغونې لپاره یې د همغږو هڅو غوښتنه وکړه.

د تورکیې ولسمشر د چهارشنبې په ورځ وویل، د اسرائیلو نسل وژنه چې په غزه کې یې له ۷۰ زرو ډېر فلسطینیان وژلي، دا یوه نښه ده چې د بشري حقونو په نړیواله اعلامیه کې ذکر شوي ارزښتونه "سخت زیانمن شوي" دي.

د ولسمشرۍ د اړیکو ریاست په یوه اعلامیه کې د بشري حقونو د ورځې په مناسبت د رجب طیب اردوغان له قوله ویلي: "له بده مرغه، د نړیوالې ټولنې د ټولو هڅو سره سره، په غزه او اشغال شویو فلسطيني سیمو کې ظلمونه دوام لري."

اردوغان د ملګرو ملتونو د بشري حقونو د نړیوالې اعلامیې د تصویب د ۷۷مې کلیزې په مناسبت د تورکیې ملت او ټول بشریت ته د مبارکۍ ویلو ترڅنګ وویل، چې دا مهم سند، چې د بشریت د ګډو ارزښتونو او لاسته راوړنو استازیتوب کوي، لاهم د یوې نړیوالې ژمنې په توګه خپل ماهیت ساتي چې د هر فرد د پیدایښتي حقونو ساتنه کوي.

خو هغه یادونه وکړه چې په اعلامیه کې شامل اصول او قواعد د نړۍ په ډېرو برخو کې تر پښو لاندې کېږي، په داسې حال کې چې د سولې او عدالت په څېر مفکورې خپل ځای له لاسه ورکولو ته دوام ورکوي.

اردوغان وویل: "دا د ټول بشریت ګډ مسؤلیت دی چې ژر تر ژره غزه بیا ورغوي، ځکه چې دا د کنډوالو په یوې لویې ډېرۍ بدله شوې ده."