په اسرائیل کې زرګونو کسانو د پارلمان ټاکنو ته درې ورځې پاتې، د لومړي وزیر بنیامین نتنیاهو د حکومت د بدلولو او د خپلو ناکامیو له امله د حساب ورکولو په غوښتنه په تل ابیب کې لاریون وکړ.
د شنبې په ماښام د یرغمل شویو کسانو په میدان (څلورلارې) کې زرګونه راټول شوي کسان د "۷م اکتوبر شورا" لخوا په جوړه شوې غونډه کې ګډون وکړ. په دې لاریون کې هغو اسرائیلیانو کورنیو، چې مخکې په غزه کې بندیان وو، ګډون کړی وو.
د سه شنبې په ورځ د ترسره کېدونکو ټاکنو دمخه، په داسې حال کې چې د نتنیاهو په مشرۍ له واکمن ایتلاف سره سیالي سخته شوې، په دې لاریون کې د اپوزیسیون مخکښو مشرانو لکه ګادي آیزنکوټ، یایر لاپید، اویګدور لیبرمن او یایر ګولان هم ګډون کړی و.
لاریون کوونکو چې د "درې کلنې مبارزې وروسته د بیارغونې بهیر پیلوو" تر شعار لاندې راټول شوي وو، د ۲۰۲۳ کال د اکتوبر د ۷مې نېټې د بریدونو پر مهال د شویو ناکامیو د مسوولینو څخه د حساب غوښتنه کوله.
ګولان وویل: "موږ به د راتلونکې چهارشنبې څخه د یوه داسې دولتي څېړنیز کمیسیون د جوړولو لپاره کار وکړو چې حقیقت رابرسېره کړي او د کورنیو لپاره عدالت تامین کړي."
له ټاکنو مخکې له واټونو څخه پیغام
د اپوزیسیون د مشرانو له ګډون سره سره، د "۷م اکتوبر شورا" ټینګار وکړ چې دا لاریون د کورنیو لخوا جوړ شوی یو مدني فعالیت دی او د کوم سیاسي ګوند یا ټاکنیز نوملړ د ملاتړ موخه نلري.
د "۷م اکتوبر شورا" د یوه مدني بنسټ په توګه فعالیت کوي چې د اکتوبر د اوومې د بریدونو پر مهال د رامنځته شویو ناکامیو د څېړلو لپاره د یوه خپلواک دولتي څېړنیز کمیسیون د جوړولو ملاتړ کوي.
خو نتنیاهو بیا د یوه خپلواک څېړنیز کمیسیون د جوړولو په تړاو غوښتنې ردوي.
د اسرائیل د ۱۲م چینل تلویزیون د راپور له مخې، د نتنیاهو په مشرۍ د لیکود ګوند د پنجشنبې په ورځ د ټاکنو مرکزي کمیسیون ته غوښتنلیک سپارلی او غوښتنه یې کړې وه چې لوی تلویزیوني چینلونه دې د دې غونډې له خپرولو څخه منع شي.
