د هند په شمال کې په آسام ایالت کې د هندوانو د یو معبد ترڅنګ د غوا د پرې کړي سر د موندل کیدو نه وروسته د هندوانو سخت غبرګون راپاریدلی دی.
په آسام، چې د هند په شمال ختیځ کې موقعیت لري، د یوې ګډوډۍ وروسته په یوه ښار کې ګرځبندیز لګول شوی دی.
د انډیا ټوډې د راپور له مخې، د هندوانو لخوا مظاهرې وشوې کله چې د هانومان معبود ته ځانګړي معبد ترڅنګ د غوا پرې شوی سر وموندل شول. دا معبد د هندوانو لپاره ځانګړی مذهبي ارزښت لري.
دا پېښه د بنګلادیش سره په پوله کې پروت د آسام په ډبري ښار کې رامنځته شوې چېرته چې ډیرمسلمانان ژوند کوي.
مظاهرهچیانو سړکونه بند کړل او ټایرونو ته یې اور واچاوه، او د چټک عدالت غوښتنه یې وکړه. ځینو مظاهرهچیانو پولیسو ته اجازه ورنه کړه چې د غوا پرې شوی سر او پاتې شوني لرې کړي، او ټینګار یې وکړ چې دا باید تر هغه پدې ځای کې پاتې شي ترڅو چې "مسؤل کسان ونیول شي او عدالت ته وړاندې شي".
راپورونه ښيي چې دا په همدې معبد کې په تېرو څو میاشتو کې درېیمه ورته پېښه ده، چې د قصدي پارونې شکونه زیاتوي. دا ډول کړنې په ځانګړي ډول په هغه هېواد کې پاروونکې ګڼل کېږي چېرته چې غواوې د ډېرو هندوانو لپاره سپېڅلې ګڼل کېږي.
د دې پېښې په ځواب کې چارواکو په ښار کې ۲۴ ساعته ګرځبندیز لګولی او د پنځو کسانو څخه د زیاتو خلکو غونډې یې بندې کړې دي. سوداګریز فعالیتونه بند شوي، او یوازې ضروري خدمات لکه روغتونونه او بیړني خدمات د فعالیت اجازه لري.
که څه هم په هند کې د غواوو اړوند پېښې نوې نه دي، خو دا پېښه په آسام کې ځانګړې حساسیتونه راپورته کړي دي. دا سیمه ډېری وخت د قومي او مذهبي کړکېچونو له امله د تاوتریخوالي مرکز پاتې شوې ده.
د آسام د نفوسي جوړښت پیچلتیا، چې په ځینو برخو کې مسلمانان اکثریت جوړوي، د اوږدې مودې لپاره د شخړو لامل ګرځېدلې ده. د نظم ساتلو لپاره پولیس او نیمهپوځي ځواکونه ځای پر ځای شوي دي. چارواکي وایي چې وضعیت لا هم ترینګلی دی، خو د کنټرول لاندې دی.
