د کډوالو د نړۍوال سازمان یو تن لوړپوړي چارواکي د سه شنبې په ورځ فرانس پریس ته وویل، څو ورځې وړاندې دا مرستې د امریکا د ولسمشر ډونلډ ټرمپ لخوا د بهرنیو مرستو د بندیز له امله کمې شوې وې.
د روهینګیا اکثریت مسلمان اقلیت په میانمار کې له سختو ځورونو سره مخ دی، او هر کال زرګونه کسان خپل ژوند په خطر کې اچوي ترڅو د اوږدو او خطرناکو سمندري سفرونو له لارې مالیزیا یا اندونیزیا ته ورسیږي.
د کډوالو نړیوال سازمان (IOM) په یوه لیک کې چې د فبرورۍ په ۲۸ نېټه لیکل شوی او فرانس پریس ته ښکاره شوی، ویلي و چې په سوماترا کې د پېکانبارو ښار نږدې ۱۰۰۰ روهینګیا کډوالو لپاره ملاتړ کم شوی دی.
خو د اندونیزیا لپاره د IOM مشر فرانس پریس ته وویل چې دا پرېکړه بیرته اخیستل شوې، پرته له دې چې د دې بدلون دلیل بیان شي.
جېفري لابوویټز وویل "زموږ تر ټولو لوی بشري مرستې پروګرام بیرته فعال شوی دی." هغه زیاته کړه "زه ددې پخلی کولی شم چې اوس مهال د خدماتو د کمولو کوم پلان نشته."
دغه ادارې په یوه بریښنالیک کې ویلي چې "موږ په اندونیزیا کې د روهینګیا کډوالو سره مرستې ته ژمن یو، او د پخوا په څیر به ، خپل ملاتړ ته دوام ورکوو."
په اندونیزیا کې له ۲۰۰۰ څخه زیات روهینګیا کډوال د قانوني ناڅرګندتیا سره مخ دي، ځکه چې هېوادونه دوی دایمي نه مني، او دوی د سرپناه او مرستو لپاره د ملګرو ملتونو ملاتړ ته اړتیا لري.
تېره اوونۍ د کډوالو نړۍوال سازمان ویلي وو چې د امریکا بندیز "زموږ پر کارکوونکو، عملیاتو او هغو خلکو چې موږ یې خدمت کوو، اغېز کړی دی." یوې سرچینې فرانس پریس ته وویل چې بندیز د دې لپاره اړین فنډونه کم کړي چې د ځورېدلي اقلیت لپاره د مرستو کچه وساتل شي.
په جاکارتا کې د امریکا سفارت د تبصرې غوښتنې ته سمدستي ځواب ونه وایه.
اندونیزیا د ملګرو ملتونو د کډوالو کنوانسیون لاسلیک کوونکی نه دی او وایي چې دوی نشي اړ ایستل کېدای چې د میانمار کډوال ومني. پر ځای یې له ګاونډیو هېوادونو غوښتنه کړې چې د دې بار شریک کړي او هغه روهینګیا کډوال بیا ځای پر ځای کړي چې د دې هېواد ساحلونو ته رسیږي.
دوشنبې په ورځ د امریکا د بهرنیو چارو وزیر مارکو روبیو وویل چې واشنګټن د USAID په پرمختیايي اداره کې ۵۲۰۰ پروګرامونه لغوه کوي، خو ۱۰۰۰ پروګرامونه به د بهرنیو چارو وزارت لخوا اداره شي.
د مرستو ډلې وایي چې ډېری مرستې د امریکا ګټې خوندي کوي، ځکه چې په بهر کې ثبات او روغتیا ته وده ورکوي.
