د امریکا ولسمشر خپله هغه ادعا بیا تکرار کړه چې د ایران پر اټومي تاسیساتو برید د دوی پروګرام 'له منځه وړی'، او د یورانیمو زیرمه یې 'دوړه' بللې ده.
د امریکا ولسمشر ډونالډ ټرمپ ویلي دي چې د ایران د غني شویو یورانیمو د زیرمو بیرته ترلاسه کول به "اوږدې او ستونزمنې پروسې" ته اړتیا ولري.
ټرمپ د دوشنبې په ورځ وویل: «عملیاتو د ایران اټومي تاسیسات په بشپړ او ټولیز ډول له منځه وړي»، او دا یې د ۲۰۲۵ کال د جون هغو بریدونو ته اشاره وه چې ده د ایران پر اټومي مرکزونو ترسره کړي وو.
د امریکا ولسمشر له اوږدې مودې راهیسې ټینګار کوي چې دغو بریدونو د ایران اټومي پروګرام په بشپړه توګه له منځه وړی، او په وروستیو کې یې د یورانیم زېرمه «دوړه» بللې ده.
هغه زیاته کړه: «له همدې امله، د دې راایستل به یو اوږد او ستونزمن بهیر وي.»
دا څرګندونې په داسې حال کې شوې دي چې په اسلاماباد کې د لوړې کچې احتمالي خبرو اترو ته چمتووالی روان دی.
ټرمپ د یکشنبې په ورځ اعلان وکړ چې د امریکا استازي به د خبرو لپاره اسلاماباد ته سفر وکړي، خو تهران لا تر اوسه په رسمي ډول خپل ګډون نه دی تایید کړی او د هرمز تنګي د محاصرې د لرې کولو غوښتنه یې کړې ده.
پاکستان د اپريل په ۱۱–۱۲ نېټه په اسلاماباد کې د امریکا او ایران ترمنځ د لوړې کچې لومړۍ مستقیمه ناسته ترسره کړه، چې دا په ۱۹۷۹ کال کې د دواړو هېوادونو ترمنځ د ډیپلوماټیکو اړیکو له پرې کېدو راهیسې لومړۍ داسې اړیکه وه، خو خبرې اترې پرته له کومې لاسته راوړنې پای ته ورسېدې.
