زهران ممداني په يوه تاريخي عامه غونډه کې د نيويارک ښار د ښاروال په توګه لوړه وکړه
ديموکرات سوسياليست د نيويارک ښار لومړنی مسلمان او د سويلي اسيا ښاروال شو، او ژمنه يې وکړه چې د ټولو لپاره به د ماشومانو پالنه، د کرايو راټیټول او د ټولو نيويارکيانو ساتنه وکړي.

زهران ممداني د ښاروالۍ په ودانۍ کې په يوه غونډه کې د نيويارک ښار د ۱۱۲م ښاروال په توګه په عامه توګه لوړه وکړه، او په دې سره د امريکا د متحده ايالتونو د تر ټولو لوی ښار لومړنی مسلمان او د سويلي اسيا مشر شو.

ممداني پر قران کريم د خپلې دندې لوړه وکړه، چې دغه مراسم د دويم ځل لپاره د امريكا سناتور برني سنډرز، چې د هغه د پرمختګپال کمپاين ملاتړ يې کړی و، له خوا ترسره شول.

ممداني په ښاروالۍ کې راټولو شويو ملاتړو، ښاري چارواکو او د کورنۍ غړو ته وويل: "زه له تاسو سره دا ژمنه کوم: که تاسې نيويارکيان ياست، زه ستاسې ښاروال يم. پرته له دې چې موږ سره موافق يو که نه، زه به ستاسې ساتنه کوم، له تاسې سره به خوښي لمانځم او په غم کې به ستاسې تر څنګ درېږم، او هېڅکله، حتی د يوې ثانيې لپاره به هم له تاسې ځان پټ نه کړم."

هغه زياته کړه: "زه د يو ديموکرات سوسياليست په توګه وټاکل شوم، او د يوه ديموکرات سوسياليست په توګه به حکومت کوم. زه به د سخت دريځه بلل کېدو له وېرې خپل اصول پرېنږدم،" او د کمپاين هغه ژمنې يې بيا تکرار کړې چې پکې د ټولو لپاره د ماشومانو پالنه او د کرايو ټیټول شامل دي.

ممداني وويل چې اداره به يې کار وکړي ترڅو ډاډ ترلاسه کړي چې هېڅ نيويارکی د لومړنيو اړتياوو له پېرودلو بې وسه نه شي، او هغه څه يې رد کړل چې ده د شتمنو اشرافو يا د يوه وېشلي ښار لپاره حکومتولي بلله.

هغه د ښار پر بېلابېلوالي هم رڼا واچوله او ويې ويل چې د نيويارک کيسه به د هغو خلکو له خوا وليکل شي چې له پښتو او مانډرين څخه نيولې تر ييديش او کريول پورې په بېلابېلو ژبو خبرې کوي، او په جوماتونو، کنيساګانو، کليساګانو، ګوردوارو او معبدونو کې عبادت کوي.

هغه وويل: "دوی به په 'بې ريج' کې فلسطيني نيويارکيان وي، چې نور به له داسې سياست سره مخ نه وي چې د ټولشمولیت خبرې کوي خو بيا دوی ترې استثنا کوي."

'تر ټولو لوی سياسي بدلون'

سنډرز د ممداني بريا "د امريکا په معاصر تاريخ کې تر ټولو لوی سياسي بدلون" وباله او ويې ويل، د هغه ژمنې چې کورونه به ارزانه کوي، عامه ترانسپورت به پراخوي او د ماشومانو لپاره به وړیا پالنه چمتو کوي، سخت دريځي نه، بلکې "يو سم او شايسته کار" دی.

د کانګرس غړې الکساندريا اوکاسيو-کورتېز وويل چې د ممداني راپورته کېدل د ښار لپاره د يوه نوي پړاو پيل دی، او هغه يې "زموږ د ټولو لپاره يو ښاروال" وباله.

دا مراسم له هغه وروسته وشول چې له نيمې شپې لږ وروسته يې يوه سمبوليکه لوړه هم کړې وه.

ممداني په ۳۴ کلنۍ کې له نسلونو وروسته د نيويارک تر ټولو ځوان ښاروال او لومړنی په افريقا کې زېږېدلی ښاروال دی.

هغه د يوګانډا په کمپالا کې د هندي کډوالو مور او پلار څخه زېږېدلی او په ۲۰۱۸ کال کې يې د امريکا تابعيت ترلاسه کړ.