د عربي ائتلاف ویاند جنرال تركي المالکي پر «X» ټولنیزه شبکه په یوه خپاره شوي بیان کې وویل، پرون مازیګر شاوخوا ۶:۵۰ بجې (په سیمه ییز وخت) د هوایي دفاع ځواکونو د حوثیانو لخوا توغول شوې ډرون مخکې له دې چې د مکې مکرمې منع شوي هوایي حریم ته ننوځي، کشف کړه.
المالکي زیاته کړه چې یاد شوی ډرون د مکې ښار په سویل کې شنډه او له منځه یوړل شوه.
جنرال المالکي په دوام کې وویل:
«دا دښمنانه او تروریستي هڅه د ۲۰۱۷ کال د جولای له ۲۷مې نېټې وروسته پر مکې مکرمې د بالستیک توغندي له برید راپدېخوا، د دغه سپیڅلي ښار د نښه کولو دویمه هڅه ده. د هغې مقدسې خاورې د په نښه کولو هڅه کول چې د وحې د نازلېدو، د رسالت د راڅرګندېدو ځای او د نړۍ د میلیونونو مسلمانانو محبوب ځای دی، یو شرمناک عمل دی. د میلیونونو مسلمانانو د احساساتو دا لمسول به د تروریستي حوثیانو پر تندي یوه نوې شرمناکه ټاپه وي.»
المالکي د حج او عمرې د زیارت کوونکو امنیت «سره کرښه» وبلله او ټینګار یې وکړ: «د ائتلافي ځواکونو قومانداني د حوثیانو د دغو دښمنانه او تروریستي کړنو پر وړاندې د ټولو اړینو او مخنیونکو اقداماتو په ترسره کولو کې هیڅ شک او ځنډ نه کوي.»
بل خوا، حوثیانو پرون هغه ادعاګانې په کلکه رد کړې چې ګویا د مکې مکرمې په ګډون په سعودي عربستان کې سپیڅلې سیمې له یمن څخه د رامنځته شوي ګواښ نښه ګرځېدلې دي.
