په سلګونو تنو اسرائیلي غاصبینو د مسجد الاقصی جومات چاپه واچوله.
د فلسطين يو چارواکي وویل چې د يهودي مذهبي اختر "پاس اوور" دريمې ورځې په پلمه په سلګونو تنو ناقانونه اسرائيلي مېشتو کسانو د اشغال شوي ختيځ بيت المقدس په الاقصی جومات چاپه واچوله او په زور سره ننوتل.
د بيت المقدس د اسلامي اوقافو د څانګې يو چارواکي د سه شنبې په ورځ وويل چې لږ تر لږه ۱,۲۲۰ ناقانونه مېشتو کسانو د اسرائيلي پوليسو په ملاتړ سهار راهيسې الاقصی جومات ته ننوتي دي.
عيني شاهدانو وويل چې اسرائیلي غاصبین د الاقصی جومات لويديځې برخې ته د "المغاربه دروازې" له لارې ننوتل.
د دوشنبې په ورځ شاوخوا ۱,۱۴۹ ناقانونه مېشت کسان الاقصی جومات ته ننوتي وو او د يکشنبې په ورځ ۴۹۴ نورو کسانو د دې اوونۍ اوږد اختر د نمانځلو لپاره دې ځای ته په زور ننوتي وو.
پاس اوور
پاس اوور د بني اسرائيلو د مصر څخه د وتلو يادونه کوي چې د حضرت موسی په وخت کې پېښه شوې وه، او دا د يهودي مذهبي کليزې يو له مهمو اخترونو څخه ګڼل کېږي.
د فلسطين د اوقافو او مذهبي چارو وزارت د معلوماتو له مخې، تېره مياشت چې مسلمانانو د روژې مبارکه مياشت نمانځله، ناقانونه مېشتو کسانو ۲۱ ځله په جومات يرغل کړی و.
د بيت المقدس د والي دفتر لخوا خپاره شوي شمېرې ښيي چې د ۲۰۲۵ کال په لومړۍ ربع کې ۱۳,۰۶۴ ناقانونه يهودي مېشتو کسانو په جومات يرغل کړی دی.
له ۲۰۰۳ کال راهيسې اسرائيل ناقانونه مېشتو کسانو ته اجازه ورکوې چې دې سپیڅلي مکان ته نږدې هره ورځ، پرته له جمعې او شنبې، ننوزي.
الاقصی جومات د مسلمانانو لپاره د نړۍ درېيم مقدس ځای دی. يهودان دې ځای ته "د معبد غونډۍ" وايي، او ادعا کوي چې په لرغونو وختونو کې دلته دوه يهودي معبدونه موجود وو.
اسرائيل په ۱۹۶۷ کال کې د عرب-اسرائيلي جګړې پر مهال ختيځ بيت المقدس اشغال کړ، چېرته چې الاقصی جومات موقعيت لري. په ۱۹۸۰ کال کې يې ټول ښار د ځان برخه اعلان کړ، خو دا اقدام هېڅکله د نړيوالې ټولنې لخوا په رسميت ونه پېژندل شو.
