د ایران د بهرنیو چارو وزیر عباس عراقچي وویل چې انګلستان او ځینې نورو اروپايي حکومتونو باید په منځني ختیځ کې د «اشغالګر او ترهګر رژیم» په جوړولو او ساتلو کې د خپل لوبولي رول له امله حساب ورکړي.
د ایران د بهرنیو چارو وزارت د خپرې شوې خبرپاڼې له مخې، د ملګرو ملتونو د عمومي اسامبلۍ غونډې لپاره امریکا تللي عراقچي، د انګلستان د بهرنیو چارو وزیر اډ ملیبنډ او د مصر د بهرنیو چارو وزیر بدر عبدالعاتي سره وکتل.
عراقچي د خپلو همکارانو سره په دغو لیدنو کې پر دوه اړخیزو اړیکو، سیمه ییزو او نړیوالو مسایلو خبرې وکړې.
عراقچي د انګلستان له بهرنیو چارو وزیر ملیبنډ سره په لیدنه کې وویل چې په سیمه او د هرمز په تنګي کې اوسنی ناامني «د امریکا او اسرائیلو له هغو بریدونو سرچینه اخلي چې د ځینو اروپايي هېوادونو په ملاتړ او همکارۍ ترسره شوي دي» او دا کار ایران، سیمې او نړۍ ته لوی زیان اړوي.
عراقچي څرګنده کړه چې په سیمه کې د تلپاتې ثبات او امنیت ټینګښت د اسرائیلي اشغال پای ته رسولو او د فلسطین د ولس د مشروع حقونو، په ځانګړې توګه د خپل برخلیک ټاکلو حق ترلاسه کولو پورې تړلی دی. هغه زیاته کړه چې د انګلستان په ګډون ځینې اروپايي حکومتونه باید په منځني ختیځ کې د «اشغالګر او ترهګر رژیم په جوړولو او ساتلو کې د خپل لوبولي رول له امله ځواب ووایی.»
عراقچي د ایران او سیمه ییزو پرمختګونو په وړاندې د ځینو اروپايي هېوادونو د «ویجاړونکو او غیرمسوولانه» چلندونو د بدلولو غوښتنه وکړه او څرګنده یې کړه چې د نورو هېوادونو په کورنیو چارو کې په لاسوهنه ټینګار او د بشري حقونو له مفاهیمو څخه د یوې وسیلې په توګه کار اخیستل په هیڅ ډول د منلو وړ نه دي.
عراقچي څرګنده کړه چې د انګلستان او ځینو اروپايي هېوادونو روان هراړخیز پوځي او سیاسي ملاتړ د فلسطین پر ولس او سیمه ییزو هېوادونو د اسرائیلو د جرمونو د زیاتېدو یو مهم لامل دی. هغه ټینګار وکړ چې انګلستان او نور هېوادونه د اړوندو نړیوالو موافقو له مخې مکلف دي چې اسرائیلي چارواکي د نسل وژنې او جنګي جرمونو په تور محاکمه او مجازات کړي.
عراقچي زیاته کړه چې ایران د خپل «سوله ییز اټومي پروګرام» د ستونزو د حل لپاره د ډیپلوماسۍ له ظرفیت څخه په ګټه اخیستنه کې مسوولانه چلند ښودلی دی. هغه وویل چې انګلستان، فرانسه او جرمني باید د اټومي مسلې په اړه د امریکا د «غیرقانوني کړنو» په پام کې نیولو او د ایران په سوله ییزو اټومي تاسیساتو باندې د امریکا او اسراییلو د پوځي تېري پر وړاندې د پرېکنده دریځ په نه غوره کولو سره ځواب ووایی.
