د اوکراین امنیتي مشر له روسیې سره د بندیانو د تبادلې د بیا پیلولو لپاره استانبول ته راغلی دی.
د استانبول په وروستي پړاو مستقیمو خبرو کې، چې د جولای په ۲۳ مه نېټه ترسره شوې ، روسیې او اوکراین د جنګي او ملکي بندیانو پر تبادلې هوکړه کړې وه.
د اوکراین د ملي امنیت او دفاع شورا منشي، رستم عمروف، د اوکرایني پلاوي په مشرۍ له روسیې سره د مستقیمو خبرو اترو لپاره د تورکیې استانبول ښار ته رسېدلی دی. دا خبرې د سې شنبې په ورځ ترسره کېږي.
عمروف په ټیلیګرام کې په یوه بیان کې ویلي، د خپل سفر موخه یې له روسیې سره د جنګي بندیانو د تبادلې بیا پیل دی. هغه ویلي: "په دې ورځو کې به زه په ترکیه او منځني ختیځ کې کار وکړم ترڅو د تبادلې بهیر خلاص کړم. یوه هوکړه شوې وه، او موږ باید هغه پلې کړو."
د عمروف په وینا، په ترکیه کې د تبادلې د بیا پیل په اړه د خبرو اترو لپاره غونډې پلان شوې دي. هغه دا نه دي مشخص کړي چې په دې غونډو کې به څوک ګډون کوي.
د استانبول په وروستي پړاو مستقیمو خبرو کې، چې د جولای په ۲۳ مه نېټه ترسره شوې وې، روسیې او اوکراین د جنګي او ملکي بندیانو پر تبادلې هوکړه کړې وه.
سربیره پردې، مسکو کیف ته وړاندیز کړی چې درې ډلې جوړې کړي چې د سیاسي، بشري او پوځي مسلو په اړه به آنلاین کار کوي. وروسته، کرملین وویل چې مسکو د دې وړاندیز په اړه د کیف څخه ځواب نه دی ترلاسه کړی.
د تورکیې ترڅنګ، متحده عربي اماراتو او تر یوې اندازې سعودي عربستان او قطر هم د روسیې او اوکراین ترمنځ د بشردوستانه تبادلو منځګړیتوب کړی دی.
