د سوریې د کورنیو چارو وزارت د داخلي امنیت اړوند یو کاروان د حسکه ولایت مرکز ته داخل شو. دا ګام د سوریې د حکومت او د YPG سازمان ترمنځ د شوې هوکړې یوه برخه ده.

د دې هوکړې د پلي کولو لپاره، یو کاروان چې اته زغره وال ګاډي، ګڼ شمېر پیک‌اپ موټر، یو امبولانس او د ګرځنده مخابراتي واحد یو موټر پکې شامل وو، د ښار د مرکز په لور حرکت وکړ؛ هغه سیمه چې د YPG تر ولکې لاندې وه.

د سوریې د کورنیو چارو وزارت د یوې خبرپاڼې له مخې، د حسکه د داخلي امنیت قومندان، بریدجنرال مروان العلي امنیتي ځواکونو ته امر کړی چې ښار ته داخل شي. العلي ټینګار وکړ چې امنیتي دندې باید له ټاکل شوي پلان سره سمې ترسره شي، قوانین مراعات شي، عامه نظم خوندي وساتل شي او د خلکو د سر او مال امنیت تضمین شي.

د سوریې د حکومت او YPG ترمنځ د شوې هوکړې له مخې، تمه کېږي چې په حسکه ښار او قامشلي ولسوالۍ کې ټول امنیتي مسوولیتونه او دولتي ادارې چې اوسمهال د دې ډلې تر کنټرول لاندې دي، د سوریې مرکزي ادارې ته وسپارل شي.

په سوریه کې وروستي بدلونونه

د جنوري په ۳۰مه اعلان شو چې د دمشق او YPG ترمنځ د اوربند او پراخ ادغام د هوکړې له مخې به امنیتي ځواکونه حسکه ته ننوځي. په دې هوکړه کې د مرکزي حسکه د عامه ادارو یوځای کول شامل دي او اوسني کارکوونکي به د دولت په رسمي معاش اخیستونکو کې شامل شي.

تر اوسه په حسکه کې د دې ځواکونو د کره ماموریت یا د پاتې کېدو د مودې په اړه جزیات نه دي ورکړل شوي. د سوریې پوځ د جنوري په ۱۶مه د فرات سیند په لویدیځو سیمو کې د SDF پر ضد عملیات پیل کړل، چې وروسته د قومي ځواکونو په ملاتړ د سیند ختیځو سیمو ته هم وغځېدل او ډېرې سیمې بېرته د حکومت لاس ته ورغلې.