چین پر پاکستان او افغانستان د کړکېچ کمولو او د خبرو اترو غږ وکړ
د چین د بهرنیو چارو وزارت ویاند: بېجینګ چمتو دی چې د اسلام اباد او کابل د اړیکو په ښه کولو کې له نړیوالې ټولنې سره خپل "رغنده رول" ته دوام ورکړي.
چین د سې شنبې په ورځ پر پاکستان او افغانستان غږ وکړ چې کړکېچ کم کړي او خبرې اترې وکړي.
د چین د بهرنیو چارو وزارت ویاند ګو جیاکون په بېجینګ کې په یوه منظمه خبري ناسته کې وویل: "پاکستان او افغانستان دواړه د چین دودیز او دوستانه ګاونډیان دي، او دا دواړه هېوادونه د یو بل ګاونډیان دي او تل به وي."
دا څرګندونې د اونۍ په پای کې د دواړو ګاونډیو هېوادونو ترمنځ له نښتو وروسته شوي، چې د راپورونو له مخې په افغانستان کې لږ تر لږه پنځه کسان په کې وژل شوي دي. خو پر پولو وضعیت ژر بېرته عادي حالت ته راګرځېدلی.
ګو وویل، بېجینګ له دواړو هېوادونو غواړي چې "د خبرو اترو او مشورو له لارې د خپلمنځي اختلافاتو او شخړو هوارولو ته دوام ورکړي، کړکېچ کم کړي، او په ګډه د سیمې سوله او ثبات وساتي."
نوموړي وویل چې چین "چمتو دی" څو له نړیوالې ټولنې سره یوځای د پاکستان او افغانستان د اړیکو په ښه کولو کې خپل "رغنده رول" ته دوام ورکړي.
