یلماز د دوشنبې په ورځ په ایکس کې په یوه بیان کې وویل: "په پیل کې، ستنېدل هغو خوندي سیمو ته ترسره شول چې موږ د سرحدي عملیاتو له لارې جوړې کړې وې. وروسته، د دیکتاتور رژیم له نسکورېدو سره دا بهیر ګړندی شو."
د کډوالۍ عمومي ریاست د معلوماتو له مخې، د ۲۰۲۴ کال د دسمبر له ۹مې راهیسې، چې د بشار الاسد رژیم د مخالفو ځواکونو د چټک برید وروسته په سوریه کې نسکور شو، ۱۴۵,۶۳۹ سوریایان په خپله خوښه خپل هېواد ته ستانه شوي دي.
یلماز زیاته کړه: "لکه څنګه چې په سوریه کې د امنیت شرایط، بنسټیز خدمات او اقتصادي چاپېریال ښه کېږي، د بیا رغونې چارې ګړندۍ شوي دي، تمه کېږي چې لا زیات سوري کډوال خپل هیواد ته ستانه شي."
له دې وړاندې، د تورکیې د بهرنیو چارو وزیر هاکان فیدان ټینګار کړی و چې په سوریه کې عادي ژوند ته راستنېدل ډېر مهم دي.
هغه وویل: "تر هغه چې عادي ژوند ته راستنېدل ممکن نه شي، په تورکیه او ګاونډیو هېوادونو کې د کډوالو لپاره بېرته ستنېدل ناشوني دي. موږ اوس ځینې پرمختګونه وینو، که څه هم په لږه کچه دي. مهمه خبره دا ده چې امنیت او ثبات یقیني او ټینګ شي."
د سوریې ولسمشر بشار الاسد، چې نږدې ۲۵ کاله یې واک درلود، د دسمبر په ۸مه د دمشق له سقوط وروسته روسیې ته وتښتېد. دا ښار د رژیم ضد ډلو تر کنټرول لاندې راغی، چې د بعث ګوند واکمني یې پای ته ورسوله. دغه ګوند له ۱۹۶۳ کال راهیسې په پر سوریې واکمني کوله.
احمد الشرع، چې د رژیم ضد ځواکونو مشري یې کوله او د اسد د واکمنۍ د پای ته رسولو لپاره یې هڅې کړې وې، د جنورۍ په ۲۹مه د انتقالي دورې لپاره ولسمشر اعلان شو.
