اردوغان په ایران کې د ملکي وګړو پر کړاوونو خواشیني څرګنده کړه؛ د نښتو د بندېدو غوښتنه یې وکړه
د تورکیې جمهوریت ولسمشر رجب طیب اردوغان په ایران کې د ملکي تلفاتو له امله خپله ژوره خواشیني څرګنده کړه او ویې ویل، چې د سولې د ټینګښت او اوربند په موخه به ډیپلوماتیکې هڅې ګړندۍ کړي.
نوموړي د دوشنبې په ورځ په پلازمېنه انقره کې یوې غونډې ته په وینا کې وویل: «موږ د ګاونډیو او وروڼو په توګه د ایران د خلکو په درد کې ځانونه شریک بولو. لکه د هرې بلې جګړې په څېر، دلته هم د نښتو ټول بار د ملکي وګړو او بې ګناه ماشومانو پر اوږو دی، چې د دغه ډول کړاوونو لیدل موږ ډېر ځوروي.»
اردوغان زیاته کړه چې ترکیه به تر هغه وخته چې په سیمه کې بیا سوله او ثبات رامنځته کېږي، په هره کچه خپلو اړیکو او تماسونو ته دوام ورکړي.
ولسمشر یادونه وکړه چې د شنبې له ورځې راهیسې یې له یو شمېر مشرانو سره هراړخیزې خبرې اترې کړي او ویې ویل: «موږ د سولې پلوي یو. غواړو چې وینه تویدنه ودرول شي، اوښکې وچې شي او زموږ سیمه هغه تلپاتې سوله ترلاسه کړي چې له کلونو راهیسې یې په تمه ده.»
هغه ټینګار وکړ چې د تورکیې لومړیتوب د اوربند رامنځته کول او د خبرو اترو د دروازو پرانیستل دي. اردوغان خبرداری ورکړ: «که اړینه مداخله ونه شي، د جګړې دا بهیر به سیمه ییز او نړیوال امنیت ته جدي پایلې ولري. هیڅوک نشي کولی د داسې یوې پروسې اقتصادي او جیوپولیټیک ناڅرګندتیا وزغمي. له همدې امله باید دا اور مخکې له دې چې نور هم خپور شي، مړ کړل شي.»
له د ناټو له عمومي منشي سره ټیلیفوني خبرې
اردوغان همداراز پر ایران له بریدونو او نښتو وروسته، د ناټو له عمومي منشي مارک روټې سره ټیلیفوني خبرې وکړې.
د تورکیې د جمهوري ریاست د عامه اړیکو ریاست د معلوماتو له مخې، اردوغان روټې ته وویل چې ترکیه «په سیمه کې د جګړې بهیر په دقت سره څاري» او «د تلپاتې او باثباته سولې لپاره ډیپلوماسۍ ته د فرصت ورکول مهم دي.»
ولسمشر اردوغان همداراز څرګنده کړه چې په انقره کې د ناټو د مشرانو د سرمشریزې لپاره چمتووالی روان دی او ترکیه به د دغې غونډې کوربه توب په خورا ښه توګه وکړي.
مارک روټې هم په خپلو خبرو کې وویل چې ناټو به د خپلو متحدینو د امنیت په تامینولو کې ۳۶۰ درجې لید لوري سره خپلې ونډې ته دوام ورکړي.
دا په داسې حال کې ده چې د شنبې په ورځ متحده ایالاتو او اسراییلو پر ایران پراخ بریدونه پیل کړل، چې د رپوټونو له مخې په پایله کې یې د مذهبي مشر علي خامنه يي په ګډون یو شمېر لوړپوړي ایراني چارواکي وژل شوي دي.
تهران په ځواب کې د خلیج هېوادونو کې پر هغو تاسیساتو چې له امریکا سره تړاو لري، د بې پیلوټه الوتکو او توغندیو بریدونه وکړل چې په ترڅ کې یې ګڼ شمېر خلکو ته مرګ ژوبله واوښته. په دغو بریدونو کې ۶ امریکايي سرتیري وژل شوي او یو شمېر نور سخت ټپيان دي.
د ایران سرې میاشتې ټولنې خبر ورکړی، چې د شنبې له ورځې راهیسې د امریکا او اسراییلو په هوايي بریدونو کې د وژل شویو کسانو شمېر ۵۵۵ ته لوړ شوی دی.
