قطر هغه تورونه غندلي او رد کړي دي چې په غزه کې د اوربند لپاره د حماس او اسرائیلو ترمنځ په خبرو اترو کې یې د مصر او منځګړو هڅو د کمزوري کولو لپاره "مالي پیسې" ورکړې دي.
د قطر د نړیوالو رسنیو دفتر د پنجشنبې په ورځ په یوه بیان کې وویل: "د قطر دولت په کلکه هغه څرګندونې غندي چې ځینو خبریالانو او رسنیو خپرې کړي، چې ګواکې قطر د مصر یا د حماس او اسرائیلو ترمنځ په روانو خبرو کې د کوم بل منځګړي د هڅو د کمزوري کولو لپاره پیسې ورکړې دي."
په بیان کې ټینګار شوی چې "دغه تورونه بې بنسټه دي او یوازې د هغو کسانو اجنډاوې ته ګټه رسوي چې غواړي د منځګړیتوب هڅې ګډې وډې کړي او د هېوادونو ترمنځ اړیکې زیانمنې کړي."
په بیان کې زیاته شوې چې دغه تورونه د غلطو معلوماتو د یوې نوې هڅې برخه ده چې غواړي د بشري کړاوونو څخه پام واړوي او د جګړې سیاسي کول دوامداره وساتي.
قطر ټینګار کړی چې "د دې ویجاړونکي جګړې د پای ته رسولو لپاره د اړوندو خواوو ترمنځ د منځګړي په توګه خپل بشري او دیپلوماتیک رول ته ژمن دی او د مصر سره په نږدې همکارۍ کار کوي ترڅو یو دوامداره اوربند ترلاسه کړي او د ملکي وګړو ژوند خوندي کړي."
قطر د مصر مهم رول ستایلی او د سیمې د ثبات لپاره د ګډ منځګړیتوب د بریا په موخه د ورځني همکارۍ یادونه کړې ده.
‘قطرګیټ’
د قطر غبرګون وروسته له هغې راغی چې اسراییلي رسنیو راپور ورکړ چې د لومړي وزیر بنیامین نتنیاهو په دفتر کې سلاکارانو د قطر څخه پیسې ترلاسه کړې دي، ترڅو داسې معلومات خپاره کړي چې د مصر د منځګړیتوب رول کمزوری کړي او د قطر هڅې وستایې.
د اسرائیلو یوې محکمې د پنجشنبې په ورځ د نتنیاهو د دوو سلاکارانو د نیولو موده د یوې بلې ورځې لپاره وغځوله، په داسې حال کې چې دوی تورن دي چې د قطر څخه یې پیسې ترلاسه کړې ترڅو د اسراییلو په رسنیو کې د دې هېواد د منځګړي په توګه انځور ښه کړي.
د اسرائیلو عامه خپرونې چینل (KAN) وویل چې د ریشون لیزیون د قاضیانو محکمې د پولیسو هغه غوښتنه رد کړه چې غوښتل یې د نتنیاهو د سلاکارانو د نیولو موده اووه ورځې نوره هم وغځوي.
KAN زیاته کړه چې پلټنو د تورنو کسانو په بیانونو کې توپیرونه څرګند کړي دي، چې د اسرائیلو رسنیو لخوا ورته د "قطرګیټ" نوم ورکړل شوی دی. د خپرونې په وینا، د تورنو کسانو څخه یو د پلټنو پر مهال دروغ ویلي، خو د هغه نوم یې نه دی څرګند کړی.
د چهارشنبې په ورځ، نتنیاهو د خپلو سلاکارانو پر وړاندې پلټنې بې بنسټه وبللې. د یروشلم پوسټ مدیر زویکا کلین د پنجشنبې په ورځ له کورني نظربندۍ خوشې شو، وروسته له هغې چې د دې قضیې سره د تړاو په اړه د هغه پوښتنې وشوې.
د اسرائیلو لوی څارنوال ګالي بحراو-میارا ویلي چې په دې قضیه کې ښایي دوه نور خبریالان هم وپوښتل شي.
