د پاکستان د دفاع وزیر اصف له افغانستان سره د خبرو د بیا پیل اعلان وکړ
پاکستان دفاع وزیر اعلان وکړ چې پاکستان د تورکیې په غوښتنه، چې د دواړو هېوادونو ترمنځ د اوربند په بهیر کې منځګړیتوب کوي، له افغان حکومت سره د خبرو اترو بیا پیلولو ته غاړه ایښې ده.
د پاکستان د دفاع وزیر خواجه محمد اصف، جیو نیوز ته په خپلو څرګندونو کې وویل، په استانبول کې میشت پاکستاني پلاوي چې د دواړو هیوادونو ترمنځه د نښتو وروسته د اعلان شوي اوربند پر جزئیاتو د کار کولو لپاره هلته تللی و، د خبرو د دوام په موخه یې د بېرته راستنېدو پلان لغوه کړی او د خپلې استوګنې موده یې غځولې ده.
د پاکستان د دفاع وزیر خواجه اصف څرګنده کړه چې پاکستان د تورکیې په غوښتنه، چې د دواړو هېوادونو ترمنځ د اوربند په بهیر کې منځګړیتوب کوي، له افغان حکومت سره د خبرو بیا پیل منلی دی. هغه زیاته کړه چې د کابل پلاوي سره د یوې عملي لارې د موندلو لپاره هڅې روانې دي.
د ډان ورځپاڼې د باخبره امنیتي سرچینو په حواله هم راپور ورکړی چې د خبرو د دوام پرېکړه "سولې ته د یو بل چانس ورکولو" په موخه شوې ده. په راپور کې ویل شوي چې د خبرو پر مهال به د پاکستان پر "بنسټیزې غوښتنې" تمرکز وشي، چې هغه "د ترهګرو پر وړاندې د افغانستان له خوا د روښانه، د تایید وړ او اغېزناکو ګامونو اخیستل" دي.
د افغانستان ملي راډیو ټلویزیون هم اعلان کړی چې د دواړو لورو ترمنځ خبرې به د تورکیې او قطر په منځګړیتوب په استانبول کې بیا پیل شي.
د پاکستان د دفاع وزیر اصف پرون ویلي وو، چې د دوی پر خاوره د هر ډول ترهګریز برید "ځواب به تریخ وي".
د پاکستان د اطلاعاتو وزیر عطاءالله تارړ هم ویلي وو چې په استانبول کې د خپل هېواد او افغانستان ترمنځ خبرې "کومه عملي پایله نه لري"، ځکه چې د کابل حکومت د خبرو د پیل له بنسټیزې موضوع څخه انحراف کړی و.
د پاکستان او افغانستان ترمنځ د نښتو وروسته، د اکتوبر په ۱۵مه د ۴۸ ساعتونو لپاره اوربند اعلان شو، چې وروسته د تورکیې او قطر په ملاتړ د قطر په پلازمېنه دوحه کې د خبرو تر پایه وغځول شو.
د دوحې په خبرو کې د تورکیې د ولسمشر رجب طیب اردوغان په لارښوونه د تورکیې د ملي استخباراتو (MİT) مشر ابراهیم قالن هم ګډون کړی و.
د خبرو اترو اصلي موضوع "د اوسني اوربند غځول او د وروستیو نښتو حل کول" وو او دواړو خواوو هوکړه کړې وه.
په دوحه کې له ۱۴ ساعته خبرو اترو وروسته پرېکړه وشوه چې یوه تخنیکي کمیټه به د اوربند پر جزئیاتو د کار کولو لپاره خپله لومړۍ غونډه په استانبول کې ترسره کوي.
د پاکستاني رسنیو د راپورونو له مخې، د پاکستان او افغانستان پلاوي د اکتوبر په ۲۵مه په استانبول کې د همدې موخې لپاره سره راټول شوي وو.
