د اسرائیل قاتل لومړي وزیر بنیامین نتنیاهو پوځ ته لارښوونه کړې چې مخکې له دې چې واشنګټن د اوربند په لور ګام پورته کړي، د ایران پر وړاندې خپل هوايي عملیات ګړندي کړي ترڅو د دغه هېواد د وسلو صنعت تر ممکنه حده ویجاړ کړي.
د نیویارک ټایمز د راپور له مخې، د اسرائیل لومړي وزیر بنیامین نتنیاهو پوځ ته امر کړی چې پر ایران خپل تېري کوونکي هوايي بریدونه د ۴۸ ساعتونو لپاره چټک کړي، ترڅو مخکې له دې چې واشنګټن د اوربند په لور حرکت وکړي، د دغه هېواد د وسلو صنعت تر ډېره حده له منځه یوسي.
دا لارښوونه وروسته له هغه وشوه چې د نتنیاهو حکومت د جګړې د پای ته رسولو لپاره د امریکا له خوا د جوړ شوي ۱۵ ماده ییز پلان کاپي ترلاسه کړه او پایلې ته ورسېد چې په دې پلان کې د ایران اټومي پروګرام یا د بالستیک توغندیو وړتیاوو ته په کافي اندازه پاملرنه نه ده شوې.
په راپور کې راغلي چې اسرائیلي چارواکي وېره لري چې د امریکا نوی ټاکل شوی ولسمشر ډونالډ ټرمپ ښايي هر وخت د سولې د خبرو اعلان وکړي.
د دغه راپور شوي پلان په اړه، د سپینې ماڼۍ ویاندې کارولین لیویټ پر احتیاط ټینګار وکړ او ویې ویل چې هغې په رسنیو کې یو پلان "خپور شوی" لیدلی، خو سپینې ماڼۍ هیڅکله هغه په رسمي ډول نه دی تایید کړی. هغې زیاته کړه: "پدې کې د حقیقت ځینې عناصر شتون لري، مګر ځینې کیسې چې ما لوستلې په بشپړ ډول حقیقت نه و."
نتنیاهو دا امر د سه شنبې په ورځ په یوه پوځي مرکزي دفتر کې د غونډې پر مهال، د پاتې اهدافو په اړه د لوړ پوړو قوماندانانو له معلوماتو وروسته ورکړ.
محدود نفوذ
د راپور په حواله چې د اسرائیلي ملي امنیت چارواکو څخه یې نقل کړي، دا بیړه هغه محدودیت منعکس کوي چې اسرائیل په جګړه کې ورسره مخ دی. د جګړې د پای ته رسولو پریکړه تر ډېره له ټرمپ سره ده، چې نتنیاهو ته یې د هغې په پای ته رسولو کې محدود واک ورکړی دی.
اسرائیلي چارواکي لا هم په خپلو کې وېشل شوي دي؛ ځینې یې لږ تر لږه د یوې بلې اونۍ بریدونو لپاره فشار راوړي، پداسې حال کې چې نور یې د جګړې ژر پای ته رسول غوره ګڼي. چارواکو ویلي چې ترټولو مهمې پوځي لاسته راوړنې په لومړۍ اونۍ کې وې، او اوس د نړیوالو افکارو، د جګړې مالي لګښت او پر اسرائیلیانو د فشار په اړه اندېښنې مخ په زیاتیدو دي.
د پاڅون په اړه بحث
د اکسیوس (Axios) په وینا، ټرمپ د نتنیاهو هغه وړاندیز رد کړی چې په عامه توګه په ایران کې پاڅون ته هڅونه وکړي. نتنیاهو په یوه وروستۍ اړیکه کې وړاندیز وکړ چې ایرانیان سړکونو ته راوتلو ته وهڅول شي، خو ټرمپ د دې نظر مخالفت وکړ او خبرداری یې ورکړ چې لاریون کوونکي ښايي "ووژل شي" (ځپل شي).
راپور زیاتوي چې اسرائیلي چارواکي په دې باور دي چې د ایران پر لوړ پوړو شخصیتونو وروستي بریدونه کولی شي نظام کمزوری کړي او د ناکراریو لپاره زمینه برابره کړي.
متحده ایالاتو او اسرائیل د فبرورۍ په ۲۸مه د ایران پر وړاندې خپله ګډه جګړه پیل کړه چې تر ۱۳۴۰ ډېر کسان پکې وژل شوي دي. ایران د سیمې په کچه په بریدونو سره ځواب ورکړی، چې د تېلو جریان او هوايي چلند یې ګډوډ کړی دی.
