د تورکیې ولسمشر رجب طیب اردوغان د اقتصادي همکاریو د غونډې په څنده کې د پاکستان له لومړي وزیر شهباز شریف سره لیدنه وکړه.
د تورکیې ولسمشر رجب طیب اردوغان د جمعې په ورځ په اذربایجان کې د پاکستان له لومړي وزیر شهباز شریف سره د لیدنې پر مهال وویل چې د دواړو هېوادونو ترمنځ په بېلابېلو برخو، په ځانګړي ډول سوداګرۍ او انرژۍ کې د همکارۍ د ژورتیا هڅې روانې دي.
دغه لیدنه د اقتصادي همکارۍ سازمان (ECO) د سرمشریزې په څنډه کې د اذربایجان په خانکندي ښار کې ترسره شوه. د تورکیې د عامه اړیکو ریاست په خپله رسمي پاڼه "ایکس" کې ویلي چې په دې ناسته کې د دواړو هېوادونو د اړیکو ترڅنګ سیمهییزې او نړیوالې موضوعګانې هم وڅېړل شوې.
اردوغان د غزې پر وړاندې د اسرائیلو د بریدونو د درولو، د اوربند د ټینګښت، او سیمې ته د بشري مرستو د پرلهپسې رسولو لپاره د ګډو هڅو پر دوام ټینګار وکړ.
په مهمو برخو کې همکاري
د پاکستان د لومړي وزیر دفتر په یوه بیان کې ویلي چې دواړو مشرانو د خپلو هېوادونو ترمنځ د اړیکو د پیاوړتیا او پرمختګ لپاره خپله ژمنتیا بیا تائید کړه.
هغوی د سوداګرۍ، دفاع، انرژۍ، اړیکو او پانګونې په څېر مهمو برخو کې د همکارۍ د زیاتوالي اړتیا په ګوته کړه.
شهباز شریف هم د سولې، ثبات، او د سیمې د دوامداره پرمختګ لپاره د تورکیې سره د نږدې همکارۍ په برخه کې د پاکستان پر "نه ماتېدونکي ژمنتیا" ټینګار وکړ.
په دې ناسته کې اردوغان سره د بهرنیو چارو وزیر حاکان فیدان، د کورنۍ او ټولنیزو خدماتو وزیره ماهینور اوزدمیر ګوکتاش، د سوداګرۍ وزیر عمر بولات، د ترانسپورت او زیربنا وزیر عبدالقدیر اورال اوغلو، د عامه اړیکو رئیس فخرالدین التون، او د بهرني سیاست او امنیت په چارو کې د ولسمشر سلاکار عاکف چاغاتای کلیچ ملګري وو.
