د سودان پوځ د هیواد په شمال کې په هوايي ډګر او بند باندې د چټک غبرګون ځواکونو د ډرون برید شنډ کړ
دچټک ځواکونو لخوا د الفاشر د نیولو وروسته، د دې ملېشې او سوډاني پوځ ترمنځ نښتې نوو جبهو ته خپرې شوې دي.
د سودان پوځ د پنجشنبې په ورځ وویل چې دوی د شمالي سوډان په ستراتیژیکو ځایونو، په شمول د هوایی ډګر او بندونو، باندې د چټک ملاتړ ځواکونو (RSF) لخوا د ډرون برید مخه نیولې ده.
د پوځ د ۱۹مې پیاده ځواکونو د قول اردو په خبرپاڼه کې ویل شوي چې د دوی ځمکنۍ ځواکونه د پنجشنبې د سهار پر مهال د چټک ملاتو ځواکونو له لوري څو ځانمرګي بې پيلوټه الوتکې شنډې کړې، چې هدف یې د قول اردو مرکز، د میروې هوایي ډګر، او د شمالي ایالت د میروې بند وه.
عیني شاهدانو د سودان سیمه ییزو خبرونو ته وویل چې د هوایی ډګر او بند په شاوخوا کې درنې چاودنې اوریدل شوي. د برید له امله د زیان کچه لا معلومه نه ده.
د پوځ د خبرپاڼې په اړه د چټک ملاتړ ځواکونو له لوري سمدستي تبصره نه ده شوې.
د شمالي سودان د مهمو ستراتیژیکو سیمو له جملې څخه، میروې یو هوایي ډګر لري چې د نظامي او ملکي موخو لپاره کارول کیږي، او همدارنګه د میروې بند، چې د هېواد له سترو زیربنایي پروژو څخه دی.
د الرقوبه نیوز د سیمه ییزو سرچینو په حواله ویلي چې برید د ایالت پلازمینه ډونګولا او د الدبا ښار هم په نښه کړ.
د RSF له لوري د شمالي دارفور ایالت د پلازمېنې الفاشر نیولو وروسته، د دې ډلې او د سوډان پوځ ترمنځ نښتې نوو محاذونو ته غزېدلې، په ځانګړي ډول د مرکزي او سویل کوردوفان ایالتونو ته.
د سودان له ۱۸ ایالتونو څخه، اوس RSF د دارفور پنځه ایالتونه په بشپړه توګه تر کنټرول لاندې لري، پرته له دې چې د شمالي دارفور یو څو شمالي سیمې لاهم د پوځ تر واک لاندې دي.
سوداني پوځ لا هم د پاتې ۱۳ ایالتونو په ډېره برخه کې واکمن دی، چې په دې کې سویل، شمال، ختیځ او مرکزي سیمې، او پلازمېنه خرطوم شامل دي.
د پوځ او RSF ترمنځ خونړۍ جګړه چې د ۲۰۲۳ کال د اپرېل میاشتې راهیسې پیل شوې، زرګونه کسان یې وژلي او میلیونه نور یې بې کوره کړي دي.
