د بایکار (Baykar) او لیوناډو (Leonardo) د ګډ شرکت لومړنۍ ډرون الوتکې به د اپریل تر میاشتې پورې بشپړې شي؛ چارواکي د چټک پرمختګ او پیاوړې همغږۍ خبر ورکوي.

د یوه چارواکي په وینا، د هغو لومړنیو منځنۍ کچې بې پیلوټه الوتکو تولید چې د تورکیې د «بایکار» او ایټالیا د «لیوناډو» شرکتونو ترمنځ په ملګرتیا جوړېږي، تمه ده چې د اپریل تر میاشتې پورې بشپړ شي.

د لیوناډو شرکت اجرایوي رئیس، روبرټو سینګولاني، د دغه شرکت د ۲۰۲۵ کال د مالي پایلو په غونډه کې وویل چې شرکت یې د بې پیلوټه الوتکو په برخه کې بې سارې بریاوې ترلاسه کړې دي. هغه د تورکي ډرون جوړونکي شرکت «بایکار» سره پر نږدې همکارۍ ټینګار وکړ.

هغه یادونه وکړه چې دواړه شرکتونه هره ورځ د نویو ټیکنالوژیو د یوځای کولو لپاره کار کوي او په دې اړه نور جزیات به په نږدې اونیو کې په یوه نوي ستراتیژیک پلان کې خپاره شي. سینګولاني د پرمختګ چټکتیا وستایله او ویې ویل چې یوازې په اتو میاشتو کې د پام وړ لاسته راوړنې لرل شوې دي.

هغه اعلان وکړ چې د لومړنیو منځنۍ کچې بې پیلوټه الوتکو سرېښل او تولید به د اپریل تر میاشتې پورې د ایټالیا په شمال کې د لیوناډو په «رونچي ډي لیګوناري» تاسیساتو کې نهایي شي. هغه زیاته کړه چې په دې پروګرام کې بېلابېل ډولونه شامل دي، چې په هغې کې ثابت وزر لرونکي (Fixed-wing) او څرخي وزر لرونکي (Rotary-wing) سیسټمونه دواړه شتون لري.