پاکستان اعلان وکړ چې پر افغانستان په روانو پوځي عملیاتو کې، د طالبانو د ادارې له خوا په خیبر پښتونخوا او بلوچستان کې د شویو بریدونو په غبرګون کې نښتې شوې دي، چې په پایله کې یې د افغانستان  لوري ۶۷ کسان وژل شوي دي.

د پاکستان د اطلاعاتو وزیر عطاء الله تارړ د ایکس (پخواني ټویټر) ټولنیزې شبکې له لارې په افغانستان کې د روانو عملیاتو په اړه توضیحات ورکړل.

تارړ په خپله اعلامیه کې ویلي: «افغان طالبانو په شمالي بلوچستان کې په قلعه سیف الله، نوشکي او چمن سیمو کې پر ۱۶ نقطو فزیکي بریدونه وکړل، چې زموږ ځواکونو په ۲۵ نقطو کې پر هغوی ډزې وکړې. په ټولو ځایونو کې بریدونه په اغېزمنه توګه په شا وتمبول شول؛ په پایله کې یې ۲۷ افغان طالبان ووژل شول او ګڼ شمېر نور ټپیان شول.»

نوموړي وویل چې په دغو نښتو کې یو پاکستانی سرتیری وژل شوی او ۵ نور ټپیان دي. تارړ دا هم زیاته کړه چې د خیبر پښتونخوا په ایالت کې په ۱۲ نقطو کې د افغان لوري له خوا بریدونه شوي، چې په ځوابي بریدونو کې د افغانستان لوري ته ۴۰ کسان وژل شوي دي.

وزیر تارړ په خپله پرونۍ وینا کې ویلي وو چې د دغو عملیاتو په لړ کې په افغانستان کې ۴۳۵ کسان وژل شوي او د ټپیانو شمېر له ۶۳۰ څخه اوښتی دی. هغه ادعا وکړه چې د کابل ادارې ۱۸۸ امنیتي پوستې، ۱۸۸ ټانکونه، زغروال ګاډي او توپخانه له منځه وړل شوي او پر ۵۱ نقطو هوايي بریدونه شوي دي.

ـ د افغانستان او پاکستان ترمنځ شخړه
د پاکستان د اطلاعاتو وزارت د فبروري په ۲۲مه اعلان وکړ چې په هېواد کې له وروستیو بمي چاودنو وروسته یې د پولې په اوږدو کې پر ۷ هغو نقطو بریدونه کړي چې دوی ورته د «ترهګرو کمپونه» وایي.

د افغانستان د دفاع وزارت په یوه اعلامیه کې ویلي وو چې د پاکستان بریدونو ته به په مناسب وخت کې «مناسب او اندازه شوی ځواب» ورکړل شي. بلخوا د پاکستان د کورنیو چارو وزیر طلال چوهدري ویلي و چې د افغانستان د پولې په اوږدو کې په بریدونو کې نږدې ۷۰ «ترهګر» له منځه وړل شوي دي.

د افغانستان سرپرست حکومت، د پاکستان له خوا د یادو ۷ نقطو له په نښه کولو وروسته، په کابل کې د پاکستان سفیر د بهرنیو چارو وزارت ته وغوښت او د اعتراض لیک یې ورته وسپاره. د افغانستان د حکومت د ویاند مرستیال حمدالله فطرت هم ویلي وو چې په متقابلو بریدونو کې ۵۲ کسان وژل شوي او ۶۶ نور ټپیان دي.

ـ د افغان حکومت څخه د پاکستان هیلې
له ۲۰۲۱ کال راهیسې چې طالبانو په افغانستان کې واک ترلاسه کړی، پاکستان تل غوښتنه کړې چې نوی حکومت باید د پاکستاني طالبانو (TTP) پر وړاندې جدي ګامونه پورته کړي. اسلام اباد ټینګار کوي چې ټي ټي پي، چې دوی یې یوه ترهګره ډله بولي، په افغانستان کې پټنځایونه لري او له هغه ځایه په پاکستان کې بریدونه تنظیموي؛ خو کابل دا ادعاګانې ردوي او وایي چې ټي ټي پي د دوی په خاوره کې فعالیت نه لري.

ټي ټي پي د ډیورنډ کرښې په اوږدو کې، چې د بریتانوي استعمار پر مهال د دواړو هېوادونو ترمنځ کښل شوې، په قبایلي سیمو کې فعاله ده.