نیوزیلینډ پر ایران د 'اټومي موافقې نه مراعاتولو' له امله د ملګرو ملتونو بندیزونه بیا ولګول

د نیوزیلینډ بهرنیو چارو وزیر وینسټن پیټرز ایران وهڅاوه چې بیا په خبرو اترو کې برخه واخلي او له اټومي انرژۍ له نړیوال آژانس (IAEA) سره خپله بشپړه همکاري بیا پیل کړي.

د نیوزیلنډ د بهرنیو چارو وزیر د جمعې په ورځ وویل چې هېواد به د ایران پر وړاندې د ملګرو ملتونو له ‌خوا تصویب شوي بندیزونه بېرته ولګوي، د دې لپاره چې ایران د خپلو اتومي ژمنو پوره کولو کې پاتې راغلی او د یورانیمو د غني ‌کولو "ناسم او غیر عادلانه" فعالیتونه یې دوام لري.

وینسټن پیټرز په یوه بیان کې وویل: " نیوزیلنډ تل له هرې سرچینې د اتومي وسلو د خپرېدو د مخنیوي لپاره د ډیپلوماټیکو هڅو ملاتړ کړی دی. موږ په کلکه له ایران غواړو چې بېرته خبرو اترو ته راستانه شي او د اټومي انرژۍ له نړیوال آژانس (IAEA) سره خپله بشپړه همکاري بیا پیل کړي".

په اعلامیه کې راغلي چې د ملګرو ملتونو د بندیزونو د تطبیق (ایران) مقررات ۲۰۲۵، چې د اکتوبر په ۱۸ نېټه نافذېږي، د دې له امله لګول کېږي چې ایران د ۲۰۱۵ کال د ګډ جامع عمل پلان (JCPOA) له نړیوالو شرطونو سره سم عمل نه دی کړی.

د مقرراتو له مخې به ګڼ محدودیتونه وضع شي، چې پکې د بندیز لګول شوو کسانو د شتمنیو کنګل، د سفر بندیزونه، د ځانګړو اتومي او پوځي توکو د وارداتو او صادراتو بندیز، او له ایران سره په راکړه ورکړه کې د نیوزیلنډیانو د احتیاط دنده شامله ده.

نیوزیلنډ به همدارنګه د هغو نیوزیلنډیانو لپاره د اجباري ثبت یو سیستم رامنځته کړي چې له ایران سره سوداګرۍ ته اراده لري، چې دا به د ۲۰۲۶ کال د فبرورۍ له لومړۍ نېټې څخه نافذ شي.

دا اعلان وروسته له هغې شوی چې بريتانیې، فرانسې او جرمني هم د ایران د سرغړونو له امله د ملګرو ملتونو بندیزونه بېرته نافذ کړل.

د ایران او امریکا ترمنځ خبرې چې د اپریل په میاشت کې د یوه پراخ اتومي تړون د بېرته راژوندي کولو لپاره پیل شوې وې، د جون په میاشت کې د اسرائیلي بریدونو له امله ودرېدلې، کومو چې د ایران اتومي او پوځي تاسیسات په نښه کړل.

ایران په وار وار دا تور رد کړی چې ګواکې د اتومي وسلو د جوړولو هڅه کوي.