د ټیکنالوژۍ میلیاردر ایلان ماسک د چهارشنبې په ورځ د اوکراین له ولسمشر ولادیمیر زیلینسکي څخه وغوښتل چې "لاړ شي" (استعفا ورکړي). له بلې خوا کییف د دغه جګړه ځپلي هېواد لپاره د امریکا د ملاتړ په اړه خپلې اندېښنې څرګندې کړې دي.
اوکراین روانه اونۍ امریکا تورنه کړه چې کییف ته د راتلونکو توغندیزو بریدونو په اړه خبرداری نه ورکوي او په هغو سپوږمکیزو سیسټمونو کې چې اوکراین یې د اړیکو لپاره کاروي، د ماسک لخوا د بدلونونو په راوستلو سره د دوی نظامي ځواب کمزوری کوي او په دې توګه له روسیې سره مرسته کوي.
ماسک په ایکس (X) شبکه کې ولیکل: "او په دې توګه وژنه دوام لري. د زیلینسکي د تلو وخت رارسېدلی دی."
زیلینسکي له ماسک څخه غوښتنه کړې وه چې د «سټارلینک» سپوږمکیز انټرنېټ خدمت بېرته فعال کړي، کوم چې د «سپیس ایکس» (SpaceX) شرکت لخوا جوړ شوی او کییف وايي چې سرعت یې کم کړی شوی دی.
ماسک وویل چې د هر ډول خنډ پړه د امریکا پر حکومت ده. هغه د «سټارشیلډ» (Starshield) — چې اوکراین د جګړې په ډګر کې د اړیکو لپاره پرې تکیه کوي او واشنګټن یې کنټرولوي — او د «سټارلینک» د ملکي سپوږمکۍ سیسټم ترمنځ توپیر په ګوته کړ، کوم چې اوکراین یې هم کاروي خو په بریدګرو عملیاتو کې د کارولو اجازه نه لري.
زیلینسکي د "خیانت" احساس کوي
دا جنجالونه وروسته له هغه راپورته شول چې زیلینسکي د یوې پوښتنې په ځواب کې "هو" وویل، کله چې ترې وپوښتل شول چې ایا د امریکا د ولسمشر ډونلډ ټرمپ لخوا له روسیې (چې له سختو بندیزونو سره مخ ده) سره د ډیزلو تیلو د برابرولو د هوکړې له اعلان وروسته د "خیانت" احساس کوي که نه.
یوه جګپوړي اوکرایني چارواکي هم وویل چې امریکا په دې وروستیو کې ګواښ کړی چې اوکراین ته به د هغو توغندیزو بریدونو په اړه د استخباراتي معلوماتو ورکول بند کړي چې د روسیې د بریدونو د مخنیوي لپاره کارول کېږي. ټرمپ دا ادعا رد کړې ده.
ټرمپ، چې راتلونکې میاشت له مهمو منځمهاله ټاکنو سره مخ دی، د روسیې د تېلو پر چاڼځایونو د اوکراین بریدونه د تېلو د اکمالاتو د کمښت او د سون توکو د بیو د لوړېدو لامل وبلل، کوم چې د امریکایي رایې ورکوونکو لپاره یوه مهمه مسله ده.
