هانګ کانګ کې په یو ښارګوټي کې د اور لګېدنې له امله د مړو شمېر ۴۴ ته لوړ شو، په سلګونو نور لادرکه دي

په هانګ کانګ  کې په یو ښارګوټي کې د اور لګېدنې له امله د مړو شمېر ۴۴ ته لوړ شو، په سلګونو نور لادرکه دي

په هغو کسانو کې چې روغتون ته وړل شوي، ۴۵ تنه لا هم په نازک حالت کې دي.

د هانګ کانګ د تای پو ولسوالۍ په یوه اته پوړیزه استوګنیز کمپلکس کې د اور لګېدنې له امله د مړو شمېر ۴۴ ته لوړ شوی، په داسې حال کې چې ۲۷۹ کسان لا هم لادرکه دي.

د سوت چاینا مارنینګ پوسټ ورځپاڼې  د راپور له مخې، د اور لګېدنې له امله د تلفاتو شمېر په دوامداره توګه مخ په زیاتېدو دی.

اورلګیدنه د چهارشنبې په ورځ غرمې مهال په دغه ښارګوټي کې چې له ۱۹۰۰ څخه زیات اپارتمانونه لري، ولګېده او د بیارغونې لپاره په بهر کې د لګول شویو بامبو سکیفولډینګ له امله په چټکۍ سره خپره  شوه.

د سیمه ییزو اور وژونکو ادارې د یوې خبرپاڼې له مخې، تر اوسه د یوه اور وژونکي په ګډون ۴۴ کسان مړه شوي دي.

په هغو کسانو کې چې د ټپونو له امله روغتون ته وړل شوي، ۴۵ تنه لا هم په نازک حالت کې دي.

په دغه ښار ګوټي  کې چې اټکل کیږي شاوخوا ۴۰۰۰ اوسېدونکي ولري، له اوو ودانیو څخه چې اور پکې لګېدلی، درې یې تر کنټرول لاندې راوستل شوي، په داسې حال کې چې په څلورو ودانیو کې اور لا هم دوام لري.

په ټولیز ډول ۲۷۹ کسان لا هم لادرکه دي، او ۲۶ اور وژونکي ټیمونه د اور وژنې عملیات پرمخ وړي.

پولیسو درې کسان - دوه مدیران او د ساختماني شرکت یو مشورتي انجنیر چې د بیارغونې چارې یې ترسره کولې - د "قتل" په تور نیولي دي.

چارواکي وايي د بیارغونې لپاره جوړ شوي بامبو سکیفولډینګ او د کړکیو پوښونکي فوم پلاستیکي موادو د اور په چټک خپرېدو کې د پام وړ مرسته کړې ده.

جګپوړې څارنوالې ایلین چونګ لای-یي وویل: "موږ د باور کولو دلیل لرو چې په شرکت کې مسؤل کسان په لویه کچه غفلت کړی، چې له امله یې اور په چټکۍ سره خپور شوی او د ډېرو تلفاتو لامل شوی دی."

له معمول څخه چټک

د هانګ کانګ د امنیت سکرتر کریس تانګ وویل، لومړنۍ څېړنې ښیي چې د اور د خپرېدو سرعت غیر معمولي و، چې تر ډېره یې د فوم عایق موادو ته اشاره وکړه.

هغه یادونه وکړه: "موږ وموندله چې د ودانیو دیوالونه پوښونکي مواد، د سکیفولډینګ شاوخوا جالۍ، او د اوبو ضد ترپال د اور لمبې د هغو موادو په پرتله چې د خوندیتوب معیارونه پوره کوي، ډېرې چټکې خپرې کړې."

په ۱۷ کلونو کې د لومړي ځل لپاره، هانګ کانګ د اورلګېدنې پنځمه درجه خطر زنګ اعلان کړ، چې د ښار په پنځه کسیزه کچه تر ټولو لوړه ده.

چارواکو راپور ورکړی چې دوه نږدې کمپلکسونه هم تخلیه شوي، او شاوخوا ۹۰۰ اوسېدونکي چې د اور له امله اغېزمن شوي، په اتو لنډمهاله مرکزونو کې پناه اخیستې ده.

له ۱۴۰ څخه زیات د اور وژنې موټرې او له ۸۰۰ څخه زیات بېړني او اور وژونکي پرسونل سیمې ته استول شوي دي.

د ټرانسپورټ ریاست اعلان وکړ چې د اور له امله شاوخوا سړکونه تړل شوي دي.

د چین ولسمشر شي جین پینګ د ځاني زیانونو له امله د هانګ کانګ حکومت ته تسلیت ووایه او په بېجینګ کې یې د هانګ کانګ او مکاو چارو دفتر ته لارښوونه وکړه چې په ځواب کې له سیمه ییزو چارواکو سره مرسته وکړي.

د هانګ کانګ اجرایوي رییس جان لي کا-چیو د مړو او ټپیانو د لوړ شمېر له امله ژوره خواشیني څرګنده کړه، د قربانیانو له کورنیو سره یې خواخوږي وکړه او ټپیانو ته یې د ژر روغتیا هیله وکړه.

هغه د ناورین په وړاندې د غبرګون د همغږي کولو لپاره له خپلې کابینې سره یوه بېړنۍ غونډه هم جوړه کړه.