د کرملین ویاند دیمیتري پیسکوف ویلي چې د جرمني د اقتصادي رقابت (سیالۍ) کمزورتیا تر یوه حده د ارزانه روسي ګازو د پېرلو د درولو او له نورو هېوادونو، په ځانګړې توګه امریکا څخه د ګرانو اکمالاتو ترلاسه کولو پرېکړې پورې تړاو لري.

پیسکوف د دوشنبې په ورځ په یوه خبري ناسته کې وویل، روسیې د جرمني د اوسني حکومت د محبوبیت ټیټه کچه او هغه شمېرې په پام کې نیولي چې د دغه هېواد د اقتصاد په رقابتي وړتیا کې کموالی ښيي.

هغه وویل: "موږ دا هم وینو چې د جرمني د اقتصاد په رقابتي وړتیا کې کموالی تر ډېره د دې حقیقت له امله دی چې جرمني د ارزانه روسي ګازو پېرودل درولي او له نورو هېوادونو، په تېره بیا له متحده ایالاتو څخه یې په ازاد بازار کې د خورا ګران بیه  او ځینې وختونه څو چنده ګران ګاز پېرودل پیل کړي دي."

پیسکوف زیاته کړه: "طبیعي ده چې جرمنیان  یا لږ تر لږه د هغوی یو شمېر د خپل وضعیت ښه کولو لپاره د اوسني مشرتابه بدیل لټوي."

د هغه دا څرګندونې وروسته له هغه مخې ته راځي چې د جرمني د کډوالۍ ضد ګوند، 'د جرمني لپاره بدیل' ، د یکشنبې په ورځ په میکلنبورګ-فورپومرن ایالت کې، په زاکسن-انهالت  کې له خپلې بې ساري بریا یوازې دوه اونۍ وروسته، د دویم ایالت ټاکنې وګټلې. د جرمني لومړي وزیر فریدریک میرز د محافظه کار سي ډي یو (CDU) ګوند رایې له ۵ سلنې څخه ښکته شوې، او دغه ګوند د لومړي ځل لپاره د جرمني یوه ایالتي پارلمان ته په ننوتلو کې پاتې راغی.

د جرمني اقتصاد، چې په اروپا کې تر ټولو لوی او په نړۍ کې درېیم لوی اقتصاد دی، په عمده توګه د صنعتي تولید د ورو کېدو له امله له جدي ننګونو سره مخ دی.

دغه هېواد له اوږدې مودې راهیسې په رقابتي بیو د صادرېدونکو توکو – لکه وسایطو، صنعتي ماشینونو، کمپیوټري هارډویر او داسې نورو – د جوړولو پر وړتیا ویاړ کاوه. خو د صادراتو پر بنسټ ولاړ اقتصادي ماډل د بېلابېلو لاملونو له امله د خپلې چټکتیا له لاسه ورکولو په حال کې دی.

د انرژۍ د بیو لوړېدل، د چینایي تولیدونکو له خوا سخت رقابت، او د امریکا لخوا تنبیهي تعرفو په نړیوال بازار کې د جرمني توکو ونډه کمه کړې ده.

په پایله کې، د جرمني په صنعتي سکتور کې د دندو کمېدو کورنۍ تقاضا کمه کړې، چې اقتصادي رکود یې نور هم اوږد کړی دی.

د دې په پایله کې، د کلنۍ اقتصادي ودې وروستۍ کچه ۰.۲ سلنې ته راښکته شوه، چې د اروپايي ټولنې د دې تر ټولو ډېر نفوس لرونکي غړي هېواد د عاید کچې ساتلو لپاره کافي نه ده.

په همدې حال کې، په برلین کې کیڼ اړخي ګوند (Left Party) د شاوخوا ۲۵.۳ سلنه رایو په ترلاسه کولو سره ایالتي ټاکنې وګټلې، چې د سي ډي یو (CDU) د ۱۹ سلنه رایو څخه مخکې و.

د فرانسې په اړه، پیسکوف د فرانسې د ښي اړخي «ملي یووالي» (National Rally) ګوند د ولسمشرۍ نوماندې مارین لو پین هغه وروستۍ څرګندونې رد کړې چې ګواکې روسیه نوره نه شي کولای د ګواښونو له لارې د فرانسې پر سیاست اغېزه وکړي.

هغه وویل: "موږ له دې بیان سره موافق نه یو. روسیه نه فرانسې او نه هم بل کوم اروپايي هېواد ته ګواښ کوي." هغه زیاته کړه چې مسکو "هیچا ته ګواښ نه کوي او نه یې هم باج اخیستنې (Blackmail) ته اړ کوي."

د روسیې پر ضد د امریکا د ولسمشر ډونالډ ټرمپ د بندیزونو د وروستۍ کڅوړې په اړه پیسکوف وویل، مسکو له خپلو سوداګریزو شریکانو سره په اړیکه کې دی او هغوی د احتمالي ثانوي بندیزونو پر وړاندې خپل مخالفت څرګند کړی دی.

هغه وویل چې نوي اقدامات به د دوه اړخیزو اړیکو په بیا رغولو یا د اوکراین د جګړې د حل پر لور هڅو کې مرسته ونه کړي.

پیسکوف زیاته کړه چې روسیې د بېلابېلو هېوادونو له خوا له لګول شویو څه باندې ۳۰ زره بندیزونو سره ځان عیار کړی او د هغوی د منفي اغېزو د کمولو لارې چارې یې موندلې دي.