د روسیې په لرې ختیځ د کامچاتکا ساحل او شاوخوا سیمې یوې ډیرې شدیدې زلزلې ولړزولې.
د امریکا د جیولوژیکي سروې ادارې (USGS) ویلي، چې د روسیې په لرې ختیځ کې د کامچاتکا ساحل ته نږدې سیمه کې د ریښتر په کچه د ۷.۴ درجې په شدت سره زلزله شوې ده.
د امریکا د جیولوژیکي سروې ادارې د معلوماتو له مخې، د شنبې ورځې دغه زلزله د کامچاتکا سیمې د اداري مرکز، پیټروپاولوفسک-کامچاټسکي ښار، ۱۱۱ کیلومتره ختیځ ته د ځمکې په ۳۹.۵ کیلومتره ژوروالي کې رامنځته شوې.
د ارام سمندر د سونامي خبرداري مرکز ویلي، چې د زلزلې له مرکز څخه تر ۳۰۰ کیلومترۍ پورې د روسیې په ساحلونو کې د "خطرناکو" څپو احتمال شته.
د امریکا د جیولوژیکي سروې ادارې تر دې مخکې د زلزلې شدت ۷.۵ ښودلی و، خو وروسته یې دا کچه ټیټه کړه.
د جولای په میاشت کې، یوه تر ټولو زوروره ثبت شوې زلزله د کامچاتکا ټاپووزمې ته نژدې وشوه، چې له امله یې په ارام سمندر کې تر څلور مترو (۱۲ فوټو) پورې لوړې سونامي څپې رامنځته شوې او له هاوايي څخه تر جاپان پورې خلک له خپلو سیمو وایستل شول.
د ۸.۸ درجې دغه زلزله له ۲۰۱۱ کال راهیسې تر ټولو لویه وه، کله چې په هغه کال جاپان ته نژدې د ۹.۱ درجې زلزلې داسې سونامي رامنځته کړه چې له ۱۵۰۰۰ څخه ډېر کسان یې ووژل.
د جولای میاشتې زلزلې په جاپان کې چارواکي اړ کړل چې نژدې دوه میلیونه خلکو ته لوړو سیمو ته د تګ امر وکړي.
په ټوله سیمه کې د سونامي خبرداری هم ورکړل شوی و، چې وروسته بېرته واخیستل شو یا یې کچه ټیټه کړای شوه.
