روسیې خبرداری ورکړی چې که لویدیځ هېوادونه په ګرینلینډ کې خپل پوځي شتون پراخ کړي نو دوی به پوځي متقابل اقدامات وکړي.
د روسیې د بهرنیو چارو وزیر سرګي لاوروف د چهارشنبې په ورځ وویل چې که لوېدیځ هېوادونه په ګرینلنډ کې خپل پوځي حضور زیات کړي، روسیه به «پوځي متقابل اقدامات» ترسره کړي.
په وروستیو اوونیو کې څو اروپایي هېوادونو ګرینلنډ ته د سرتېرو کوچنۍ ډلې استولي دي، وروسته له هغې چې ولسمشر ډونالډ ټرمپ څو ځله ویلي چې غواړي دا ارکټیک ټاپو له ځان سره یوځای کړي.
لاوروف د روسیې وکیلانو ته په خپله وینا کې وویل: «البته، که ګرینلنډ پوځي شي او داسې پوځي وړتیاوې پکې رامنځته شي چې د روسیې پر ضد وي، موږ به مناسب متقابل اقدامات ترسره کړو، چې پوځي-تخنیکي اقدامات به هم پکې شامل وي.»
ګرینلنډ، چې شاوخوا ۵۷ زره اوسېدونکي لري، له لسیزو راهیسې د ډنمارک یوه خپلواکه سیمه ده.
ټرمپ تېره میاشت د ګرینلنډ د نیولو له ګواښونو شا ته شو، وروسته له هغې چې ویې ویل د ناټو له مشر مارک روټه سره یې د امریکا د لا زیات نفوذ د تضمین لپاره د «چوکاټي» هوکړې موافقه کړې ده.
هغه تر دې مخکې خبرداری ورکړی و چې که متحده ایالات ګرینلنډ ونه نیسي، نو ښايي روسیه یا چین یې ونیسي.
لاوروف وویل: «امریکا، ډنمارک او ګرینلنډ باید دا موضوع پخپله حل کړي.»
هغه ډنمارک تورن کړ چې د ګرینلنډ له اوسېدونکو سره د «دوهم درجې اتباعو» په توګه چلند کوي.
ګرینلنډ ویلي چې حاکمیت او ځمکنۍ بشپړتیا یې د واشنګټن سره په هر ډول خبرو کې «سره کرښه» ده.
