د اوکراین په اودیسا بندر کې د تورکیې د مایع ګاز په یوه کښتۍ کې اور لګېدلی دی
د یوې بې پیلوټه الوتکې د ټوټو غورځېدو له امله د تورکیې په یوه کښتۍ کې چې مایع طبیعي ګاز یې لېږدول، اور لګېدلی او لا هم دوام لري. د شرکت تخنیکي ټیم سیمې ته د تګ لپاره چمتووالی نیسي ترڅو معلومه کړي چې ایا کښتۍ بیا د چلولو وړ ده که نه.
د اوکراین په اودیسا ښار کې د تورکیې سرقونسل، محی الدین چیلیک وویل، د اوکراین په ازمایل بندر کې د تورکیې اړوند د مایع ګاز (LPG) په کښتۍ کې لګېدلی اور لا هم دوام لري.
چیلیک وویل، اور د ترکیې اړوند د "اورینډا" په نوم د مایع ګاز په کښتۍ کې د بار خالي کولو پر مهال ولګېد. هغه زیاته کړه چې د کښتۍ ټول کارکوونکي ایستل شوي او روغتیايي وضعیت یې ښه دی، خو د چاودنې خطر لا هم شته.
چیلیک وویل، پېښه د دوشنبې په سهار وختي رامنځته شوې او لامل یې یوه بې پیلوټه الوتکه وه.
هغه وویل، د کښتۍ کارکوونکو د سرقونسلګرۍ د بېړنۍ اړیکې له لارې د وضعیت په اړه خبر ورکړی، او د قونسلګرۍ کارکوونکو له ځايي چارواکو سره په همغږۍ د کارکوونکو د خوندیتوب لپاره لازم قونسلګري ملاتړ او اقدامات ترسره کړي دي.
ویل شوي چې د کښتۍ د ۱۶ کسیزې عملې روغتیايي وضعیت ښه دی، خو په کښتۍ کې د مایع ګاز دوه پر درېیمه برخه لا هم نه ده خالي شوې. د اور وژنې ډلې هڅه کوي چې کښتۍ په اوبو سره سړه کړي. د چاودنې د خطر له امله په بندر کې امنیتي تدابیر سخت شوي دي.
چیلیک وویل، تمه کیږي چې د کښتۍ د مالک شرکت یو تخنیکي ټیم به بندر ته راشي، او له تورکیې څخه د راغلي ټیم د راپور له مخې به پرېکړه وشي چې ایا کښتۍ بیا د چلولو وړ ده که نه.
د تورکیې د ترانسپورت او زیربنا وزارت د سمندري چارو عمومي ریاست تر دې مخکې اعلان کړی و چې په کښتۍ کې ۱۶ تنه ترکي کارکوونکي وو او اور د اوکراین په ازمایل بندر کې د بار خالي کولو پر مهال لګېدلی و.
