د تورکیې ولسمشر اردوغان ټینګار وکړ " موږ هڅه کوو چې اور مړ کړو مخکې له دې چې لمبې یې نورې هم سترې شي، مخکې له دې چې د اور کړۍ نوره هم پراخه شي، او مخکې له دې چې نورو ژوندونو ته زیان ورسېږي او نوره وینه تویه شي،"
د تورکیې ولسمشر رجب طیب اردوغان ویلي چې د ایران په اړه د انقرې دریځ "روښانه" دی، او زیاته یې کړه چې تورکیه تل د سولې په لوري ولاړه ده، نه د جګړې.

په ایران کې د اوربند لپاره د خپل هېواد هڅو ته په اشارې سره، اردوغان د چهارشنبې په ورځ وویل چې انقره "پراخې هڅې کوي ترڅو ډاډ ترلاسه کړي چې وسلې غلې شي، اوربند رامنځته شي او خبرې اترې بېرته پیل شي."

هغه ټینګار وکړ: "موږ هڅه کوو چې اور مړ کړو مخکې له دې چې لمبې یې نورې هم سترې شي، مخکې له دې چې د اور کړۍ نوره هم پراخه شي، او مخکې له دې چې نورو ژوندونو ته زیان ورسېږي او نوره وینه توی شي."

د اسرائیلي ادارې پر کړنو د سختو نیوکو په ترڅ کې، اردوغان وویل: "حتی هغه اسرائیلیان چې شپې په پناه ځایونو کې تېروي، اوس وايي چې (لومړی وزیر بنیامین) نتنیاهو له هولوکاسټ وروسته د دوی لپاره تر ټولو لوی ناورین دی."

امریکا او اسرائیلو د فبرورۍ په ۲۸مه پر ایران ګډ بریدونه پیل کړل، چې په پایله کې یې د هغه وخت د ستر رهبر علي خامنه يي او دغه راز د ۱۵۰ څخه د زیاتو زده کوونکو نجونو په ګډون تر ۱۳۰۰ ډېر کسان وژل شوي دي.

تهران په ځواب کې پر اسرائیلو، اردن، عراق او د خلیج پر هغو څو هېوادونو چې د امریکا پوځي اډې او تجهیزات پکې ځای پر ځای دي، د بې پیلوټه الوتکو (ډرون) او توغندیو بریدونه کړي دي.