د بنګله دیش په پلازمینه ډاکه په کورایل سیمه کې سترې اورلګېدنې ۱۵۰۰ کورونه ویجاړ کړل
کورایل، چې شاوخوا لس زره کورونه پکې اټکل شوي، په وروستیو کلونو کې له ګڼو اورلګېدنو سره مخ شوې، چې پکې تېر کال په فبروري، مارچ او ډسمبر کې لویې اورلګېدنې هم شاملې دي.
د بنګله دېش د اور وژنې ادارې د چارواکو په وینا، د پلازمینې ډاکه په تر ټولو ستره بېوزله سیمه کې یوې لویې اورلګېدنې شاوخوا ۱۵۰۰ کورونه ویجاړ کړي او زرګونه اوسېدونکي یې بې کوره کړي دي.
اورلګېدنه د سې شنبې په شپه په کورایل سیمه کې رامنځته شوه، چې د پلازمېنې له شتمنو ګلشن او بناني سیمو سره ګډه پوله لري.
د اور وژنې ۱۹ ټیمونو له پنځو ساعتونو وروسته اور تر کنټرول لاندې راوست، او چارواکو وویل چې اور په بشپړ ډول د چهارشنبې تر سهاره مړ شوی و.
سمدستي د کومې مرګ ژوبلې راپور نه دی ورکړل شوی.
د اور وژنې او ملکي دفاع ادارې مشر، ډګرمن محمد تاج الاسلام چوهدري، په سیمه کې خبریالانو ته وویل چې د تنګو لارو او ډېرو اور اخیستونکو ساختماني موادو له امله اور په چټکۍ سره خپور شو.
هغه وویل چې پلټونکي به د زیانونو کچه او د اور لامل معلوم کړي، خو په ټوله سیمه کې یې خطرناکو شرایطو ته اشاره وکړه.
هغه وویل: "د اور وژنې پر مهال وموندل شوه چې هر ځای برقي مزي پراته دي، او په هر کور کې د ګازو ډبې شتون لري - دا هغه شرایط دي چې اور ته زور ورکوي،" او خبرداری یې ورکړ چې د ژمي په موسم کې معمولاً دا ډول پېښې ډېرېږي.
کورایل، چې په شاوخوا ۹۰ جریبه ځمکه کې یې شاوخوا ۱۰،۰۰۰ کورونه اټکل شوي، په وروستیو کلونو کې له ګڼو اورلګېدنو سره مخ شوې، چې پکې تېر کال په فبروري، مارچ او ډسمبر کې لویې اورلګېدنې هم شاملې دي.
د لنډمهالي حکومت مشر محمد یونس پر دې ویجاړۍ ژوره اندېښنه څرګنده کړه او له اغېزمنو شویو کورنیو سره یې خواخوږي څرګنده کړه.
هغه وویل، چارواکي به د بیارغونې لپاره ټولې اړینې مرستې چمتو کړي او د اورلګېدنې په اړه یې د بشپړې څېړنې او په راتلونکي کې د دا ډول پېښو د مخنیوي لپاره د قوي اقداماتو امر وکړ.
