تورکیې د اسرائیلو لخوا فلسطینیان له خپلې خاورې نه په اجباري توګه د شړولو او اشغال لاندې لویدیځې غاړې د الحاق هڅې یو ځل بیا په کلکه توګه وغندلې او وویل چې دا د هیچا لپاره د منلو وړ ندي.
د تورکیې د بهرنیو چارو وزیر حاکان فیدان په استانبول کې د حماس ډلې یو پلاوي سره لیدنه وکړه.
د تورکیې د بهرنیو چارو وزارت ویلي دي چې حاکان فیدان د جمعې په ورځ په استانبول کې د حماس د یوې پلاوي سره چې مشري یې محمد اسماعیل درویش کوله، لیدنه وکړه.
د حماس پلاوي ټینګار وکړ چې غزې ته د بشري مرستو اندازه د اړتیاوو په پرتله ډېره کمه ده او د اوربند په خبرو کې د اسرائیلو سخت دریځ یې وغنده.
فیدان وویل چې اسرائیل د غزې د خلکو د لوږې له لارې د نسل وژنې سیاست ته دوام ورکوي او زیاته یې کړه چې دا چلند ښيي د بنیامین نتانیاهو حکومت د اوربند په اړه جدي ندی.
هغه ټینګار وکړ چې اسرائیل غواړي د اوربند خبرې اوږدې کړي او د خلکو مقاومت مات کړي او پر هغوی د بې ځایه کېدو فشارونه لا زیات کړي.
فیدان د خبرو د دوام لپاره د تورکیې ملاتړ په ګوته کړ او یادونه یې وکړه چې د فلسطینیانو لپاره د نړیوالې عامه ملاتړ کچه مخ په زیاتېدو ده.
هغه وویل چې د عامه فشار په پایله کې، نور او نور هېوادونه د فلسطین دولت په رسمیت پېژني او اسرائیل په نړیواله کچه لا ډېر منزوي کېږي.
فیدان همدارنګه ټینګار وکړ چې د فلسطین د قضیې لپاره د تورکیې ملاتړ به په پیاوړي ډول دوام وکړي.
د نړیوالو لخوا د اوربند غوښتنې ردولو سره، اسرائیلي پوځ د ۲۰۲۳ کال د اکتوبر له ۷مې نېټې راهیسې په غزه باندې یو وحشیانه برید پیل کړی چې تر اوسه یې له ۶۰,۰۰۰ څخه زیات فلسطینیان وژلي، چې ډېری یې ښځې او ماشومان دي. دغه بې رحمه بمبارۍ د غزې سیمه ویجاړه کړې او د خوراکي توکو کمښت یې رامنځته کړی دی.
