د وال سټریټ ژورنال د راپور له مخې، دا ګام د هرمز تنګي له لارې د سوداګریزو بېړیو د تګ راتګ د لارو خوندي کولو لپاره د ولسمشر ټرمپ د هڅو پر وړاندې یو لوی خنډ لیرې کوي.
سعودي عربستان او کویټ د امریکا پر پوځ هغه محدودیتونه لرې کړي چې د خپلو اډو او هوايي حریم د کارولو په برخه کې یې لګولي وو. دا محدودیتونه وروسته له هغه لګول شوي وو چې امریکا د هرمز تنګي د بیا پرانیستلو په هدف عملیات پیل کړل.
وال سټریټ ژورنال د پنجشنبې په ورځ د امریکايي او سعودي چارواکو له قوله ویلي چې د ټرمپ اداره چمتووالی نیسي ترڅو د هغو سوداګریزو بېړیو لپاره د سمندري بدرګې عملیات بیا پیل کړي چې د هرمز تنګي څخه تېرېږي. په دې عملیاتو کې به امریکايي سمندري او هوايي ځواکونه ملاتړ چمتو کوي.
ویل کېږي چې دا ماموریت د روانې اونۍ په پیل کې، له ۳۶ ساعتونو فعالیت وروسته، په موقتي ډول درول شوی و. اوس د پنټاګون پلان جوړونکي د عملیاتو د بیا پیلولو مهالوېش ارزوي، او ځینې امریکايي چارواکي وايي چې دا چارې ښايي همدا اونۍ بېرته پیل شي.
دا پرمختګ د ایران په ګډون د سیمې د ترینګلي وضعیت پر مهال د دغې حیاتي اوبلارې له لارې د سوداګریزو بېړیو د تګ راتګ د خوندي کولو لپاره د ډونالډ ټرمپ د هڅو په لاره کې یو مهم خنډ له منځه وړي.
سیمه ییز کړکېچ وروسته له هغه زیات شو چې امریکا او اسراییلو د فبرورۍ په ۲۸مه پر ایران بریدونه وکړل، چې په غبرګون کې یې تهران پر اسراییلو او په خلیج کې د امریکا پر متحدینو بریدونه وکړل او د هرمز تنګی یې وتاړه.
د پاکستان په منځګړیتوب د اپریل په ۸مه یو اوربند وشو، خو په اسلام اباد کې خبرې اترې کومې تلپاتې هوکړې ته ونه رسېدې. ولسمشر ټرمپ وروسته دا اوربند پرته له کوم ټاکلي نیټې وغځاوه. بلخوا، امریکا د اپریل له ۱۳مې راهیسې په دغه تنګي کې د ایران پر سمندري تګ راتګ بندیز (ناوتيک محاصره) لګولی دی.
ټرمپ د سه شنبې په ورځ اعلان وکړ چې امریکايي پوځ به په موقتي ډول "پروژه ازادي" ودروي، خو ویې ویل چې پر ایران د امریکا لګول شوې سمندري محاصره به په بشپړ ځواک سره دوام ولري.
