د هند ټاټا شرکتي ډله په غزه کې د اسرائیلو په نسل وژنه او د فلسطین په اشغال کې شریکه ده

امریکایي فعالانو د ټاټا ګروپ تورن کړی چې په فلسطین کې "د صهیونیسټي استوګنیز-استعماري پروژې، روان پوځي اشغال او نسل وژنې له تاوتریخوالي څخه ملاتړ کوي او ګټه ترې پورته کوي."

د امریکایي فعالانو له خوا د خپاره شوي نوي راپور له مخې، د هند تر ټولو ستره شرکتي ډله، ټاټا، د هند او اسرائیلو د پوځي اتحاد "په زړه کې" ځای لري او د فلسطینیانو د اسرائیلي اشغال، څارنې او له خاورې شړلو په جوړښت کې بنسټیز رول لري.

دغه راپور چې «د اشغال معماران: ټاټا ګروپ، هندي سرمایه، او د هند-اسرائیل اتحاد» نومېږي، په نیویارک کې د "سلام" په نوم د سویلي اسیا یوې سیاسي ډلې خپور کړی او د هند دغه سوداګریزه امپراتوري یې پر فلسطینیانو د اسرائیلو د کنټرول سیسټم "یو مهم مرسته کوونکی" بللی دی.

څېړنه وايي، د ټاټا ښکېلتیا د وسلو، دفاع او ډیجیټل ټکنالوژۍ سکتورونه رانغاړي.

د سلام له خوا چمتو شوي راپور کې راغلي: "د دې شرکتي ډلې ګډون هر اړخیز دی، چې د نسل وژنې لپاره وسایل، د ورځني ظلم ماشینري، او د نژادي تبعیض ډیجیټل ملا تیر برابروي. دا شرکت د خپلې یوې فرعي کمپنۍ، ټاټا اډوانسډ سیسټم لمټډ (TASL) له لارې، د ټولو نویو F-16 جنګي جټ الوتکو لپاره وزرونه او د ټولو AH-64 اپاچي بریدګرو هلیکوپترو لپاره بدنې جوړوي – دا هغه لومړنۍ الوتکې دي چې د اسرائیلو هوايي ځواک یې پر غزې د بمبارۍ لپاره کاروي."

راپور ښیي چې TASL د اسرائیلو له فضايي صنایعو (IAI) سره د خپل شراکت له لارې، د بارک-۸ توغندي لپاره مهم قومانداني سیسټمونه هم جوړوي، دا هغه وسله ده چې د اسرائیلو سمندري ځواکونه یې په فعاله توګه کاروي.

راپور ادعا کوي چې د موټرو په سکتور کې، ټاټا موټرز د خپلې فرعي کمپنۍ، جګوار لېنډ روور له لارې، د MDT ډیویډ سپکو زغره والو موټرو لپاره بنسټیزه شاسي (چوکات) برابروي، چې اسرائیلي ځواکونه یې په اشغال شوې لوېدیځه غاړه کې د ګزمو، چاپو او د خلکو د ځپلو لپاره کاروي.

د ټاټا مرستې بې طرفه سوداګریزې چارې نه، بلکې "د اسرائیلو د نسل وژنې د وسایلو او د ورځني ظلم د ماشینرۍ اصلي برخې دي."

په ډیجیټل برخه کې، څېړنه وايي، ټاټا کنسلټنسي سرویسز (TCS) د اسرائیلو مالي او حکومتي سیسټمونو ته مهمې زیربناوې برابروي، چې په کې د "نمبس پروژې" په څېر په یوه جنجالي کلاوډ کمپیوټینګ پروګرام کې ښکېلتیا هم شامله ده، کوم چې د فلسطینیانو په څارنه او کنټرول کې له اسرائیلو سره مرسته کوي.

تر اوسه پورې، ټاټا ګروپ د سلام راپور ته ځواب نه دی ویلی.

د شرکتونو او پوځ ترمنځ پراخېدونکی تړاو

د ټاټا سوداګریز فعالیتونه "یوازې جلا اقتصادي شراکتونه نه دي، بلکې د اسرائیلو د اشغال اقتصاد او نړیوالو جنګي صنایعو سره تړلي دي."

دا موندنې ټاټا د هند، اسرائیلو او متحده ایالاتو ترمنځ په یوه مخ پر ودې دفاعي شبکه کې ځایوي.

په راپور کې راغلي: "د اسرائیلو په دولتي ماشینرۍ کې د ټاټا ژوره ښکېلتیا د نړیوالې دفاعي-صنعتي شبکې له لارې لا پیاوړې شوې ده،" او زیاتوي چې په هند کې جوړ شوي پرزې په منځني ختیځ کې د امریکا په جګړو کې هم کارول شوې دي.

راپور وايي: "د جنجالي کشمیر پر سر له ډرون الوتکو نیولې بیا د کلابندې غزې پر سر تر جنګي جټ الوتکو پورې، د ټاټا د فلز او کوډ نښې تر هر څه لاندې شتون لري."

د دې ډلې راپور وايي، له نړیوالو بندیزونو سره سره، اسرائیل د هند د وسلو له تولید څخه ګټه پورته کوي، په داسې حال کې چې هند د اسرائیلي ټکنالوژۍ په کارولو سره د ځان بسیاینې په لټه کې دی، او ټاټا له دې معاملې څخه ګټه ترلاسه کوي.

'د سپورټ له لارې د شهرت سپینولو یوه ښکاره بېلګه'

دغه ډله ټاټا تورنوي چې د خیریه بنسټونو او په امریکا کې د خپل شتون په کارولو سره د یوې ښېګڼې کوونکې بڼې په جوړولو سره خپل فعالیتونه پټوي.

سلام استدلال کوي: "د شهرت سپینولو دا ستراتیژي د نیویارک ښار د ماراتون د اصلي سپانسر په توګه خپل اوج ته رسېږي، چې دا د سپورټ له لارې د جنایتونو پټولو یوه ښکاره بېلګه ده او موخه یې له نسل وژنې څخه د ګټې اخیستنې په برخه کې د خپل رول پټول دي."

سلام وايي، د ۲۰۲۴ کال له دوبي راهیسې یې د #TataByeBye (ټاټا خدای پامان) په نوم کمپاین پیل کړی "ترڅو دا جنګي اقتصاد افشا او له منځه یوسي، کوم چې لرې نه، بلکې په هغو جغرافیو کې ریښې لري چې موږ په کې فعالیت کوو."

راپور د ټاټا فعالیتونه د هند او اسرائیلو د مخ پر ودې اړیکو په چوکاټ کې، په ځانګړې توګه د دفاع، ټکنالوژۍ او استخباراتو په برخو کې، څېړي.

هند اوس د اسرائیلي وسلو تر ټولو لوی پېرودونکی دی، او د ټاټا ګڼې فرعي کمپنۍ د دې بهیر په ساتلو کې مرکزي رول لوبوي.

د ملګرو ملتونو د ځانګړې راپور ورکوونکې فرانچیسکا البانیز یوه وروستي راپور ثبت کړې چې د ۲۰۲۳ کال له اکتوبر راهیسې، هند د هغو ۲۶ هېوادونو په ډله کې دی چې په غزه کې د جنګي جنایتونو او نسل وژنې له پراخو تورونو سره سره یې اسرائیلو ته وسلې او مهمات صادر کړي دي.

نیوکه کوونکي وايي چې هندي شرکتونو د ډرون، مهماتو او کارګرانو په برابرولو سره په غزه کې د اسرائیلو له نسل وژنې سره مرسته کړې، چې د فلسطینیو کارګرانو ځای یې نیولی دی.

د سلام راپور همدارنګه د هند او اسرائیلو اتحاد له ۱۹۶۰ لسیزې راهیسې د پټو وسلو له معاملو څخه تر نن ورځې پورې د رسمي "ستراتیژیک شراکت" پورې څېړي، کوم چې د هند د ښي اړخي لومړي وزیر نریندرا مودي او د اسرائیلو د افراطي مشر بنیامین نتنیاهو تر مشرۍ لاندې رامنځته شوی.

راپور وايي: "د هند او اسرائیلو شراکت د یوې پانګوالې طبقې د متقابلو ګټو پر بنسټ جوړ شوی چې د نویو بازارونو په لټه کې دي، د هند دولت چې په سیمه کې د واکمنۍ په لټه کې دی، او د صهیونیزم او هندو ملتپالنې (هندوتوا) ترمنځ د مشترکو ایډیالوژیکي تمایلاتو پر بنسټ ولاړ دی."