د شمالي کوریا مشر کیم جونګ اون د کروز توغندیو د توغولو د تمریناتو څارنه وکړه
کیم ټینګار وکړ چې شمالي کوریا به د خپل اټومي جنګي ځواک پراختیا ته خپلې ټولې هڅې وقف کړي.
د شمالي کوریا دولتي رسنۍ KCNA د دوشنبې په ورځ وویل چې د شمالي کوریا مشر کیم جونګ اون د اوږد واټن ویشتونکو ستراتیژیکو کروز توغندیو د توغولو د تمریناتو څارنه وکړه.
کیم وویل، "په منظمه توګه د شمالي کوریا د اټومي مخنیوي د برخو د اعتبار او چټک غبرګون کتل یوازې یو مسؤلانه تمرین دی،" ځکه چې هیواد "د مختلفو امنیتي ګواښونو سره مخ دی."
د شمالي کوریا دولتي خبري اژانس وویل، کیم ټینګار وکړ چې شمالي کوریا به د خپل اټومي جنګي ځواک پراختیا ته خپلې ټولې هڅې وقف کړي.
تېره اونۍ، شمالي کوریا ویلي وو چې هوډ لري نوې جوړه کړې اوبتل کښتۍ په اټومي وسلو سمبال کړي، او دا یې "ستراتیژیک لارښود توغندي اوبتل" یا "ستراتیژیک اټومي برید اوبتل" بللی و.
اټومي ځواک لرونکی اوبتل د هغو پرمختللو وسلو په لیست کې و چې کیم په ۲۰۲۱ کال کې په یوه لویه سیاسي غونډه کې په ګوته کړی و په شمول د جامد سونګ توغندیو، هایپرسونیک وسلو، کشفي سپوږمکیو او څو سرګلولې توغندیو.
