په پاکستان کې د امنیتي ځواکونو او پاکستاني طالبانو تر منځ نښته شوې چې دواړو خواو ته ځاني زیان اوښتی

په پاکستان کې د امنیتي ځواکونو او پاکستاني طالبانو تر منځ په نښته کې  ۷ تنه پاکستاني طالبان او ۶ تنه سرتیرو ژوند د لاسه ورکړی دی.

د پاکستان پوځ اعلان وکړ چې د هېواد د خیبر پښتونخوا ایالت په کرمه ایجنسۍ کې د پاکستاني طالبانو (ټي ټي پي)  وسله والو پر وړاندې په عملیاتو کې ۷ تنه پاکستاني طالبان وژل شوي او ۶ تنو سرتیرو ژوند د لاسه ورکړی دی.

د پاکستان د پوځ د عامه اړیکو څانګې (ISPR) په یوه بیان کې ویلي چې امنیتي ځواکونو د استخباراتي معلوماتو پر بنسټ د کرمې په سیمه کې عملیات ترسره کړي دي.

په بیان کې ویل شوي چې په دغو عملیاتو کې ۷ وسله وال چې د ټي ټي پي سره یې تړاو درلود او د هند له خوا یې ملاتړ کېده، وژل شوي دي.

همدارنګه په دې نښته کې د ۶ تنو امنیتي سرتېرو د وژل کېدو خبر هم ورکړل شوی دی.

په سیمه کې د نورو احتمالي وسله والو پر وړاندې پوځي عملیات دوام لري.

د پاکستان د ترهګرۍ ستونزه

په پاکستان کې وسله وال بریدونه په ځانګړې توګه د خیبر پښتونخوا او بلوچستان په ایالتونو کې ډېر شوي دي.

په دواړو ایالتونو کې وسله والې ډلې چې د پښتنو او بلوڅو قومونو د حقونو د دفاع ادعا کوي، د پاکستان پر امنیتي ځواکونو بریدونه کوي.

اسلام اباد ادعا کوي چې پاکستاني طالبان په افغانستان کې ځای پر ځای شوې او له هغه ځایه خپل بریدونه تنظیموي، خو افغان حکومت دا ادعاوې ردوي.

په بلوچستان کې بیا د بلوچستان د ازادۍ پوځ (BLA) بریدونه ډېر کړي. نوموړې بیلتون غوښتونکې ډله غواړي چې بلوچستان له پاکستانه جلا کړي او بلوچ ولس پر دغه سیمه واکمن شي.