د امریکا پوځ ویلي دي چې د پنجشنبې ورځې برید د ایران ملاتړ لرونکو حوثیانو د اکمالاتو او مالي سرچینو د مخنیوي په موخه ترسره شوی دی.

واشنګټن له مارچ ۱۵ راهیسې په نږدې ورځني ډول د حوثیانو پر وړاندې هوايي بریدونه ترسره کوي، څو د هغوی هغه بریدونه پای ته ورسوي چې د سره سمندر او عدن خلیج کې یې پر ملکي کښتیو او پوځي بېړیو ترسره روان کړي دي.

دغه ډلې د ۲۰۲۳ کال په وروستیو کې د فلسطینیانو سره د پیوستون په موخه خپل بریدونه پیل کړل.

د اسرائیلو پوځ د جمعې په ورځ ادعا وکړه چې له یمن څخه یو توغندی شنډ کړی دی.

د امریکا د مرکزي قوماندې (CENTCOM) په یوه بیان کې ویل شوي: "د دې بریدونو موخه دا وه چې د حوثیانو اقتصادي ځواک کمزوری شي، کوم چې د خپلو هېوادوالو لپاره لوی درد او کړاو رامنځته کوي."

د حوثیانو د روغتیا وزارت ویاند انیس الاصبحي وویل چې د لومړنیو معلوماتو له مخې ۲۰ کسان وژل شوي، چې په کې پنځه د امبولانس کارکوونکي دي.

هغه په ایکس (پخوانی ټویټر) کې زیاته کړه: "د راس عیسی د تیلو بندر کې د امریکايي برید له امله ۵۰ کارکوونکي ټپیان شوي دي."

هغه وویل: "د مړو شمېر ښايي زیات شي، ځکه چې د ځینو جسدونو ټوټې لا هم تشخیص شوي ندي."

د راس عیسی بندر د یمن په لویدیځ کې د سره سمندر پر غاړه پروت دی.

د جمعې په سهار د حوثیانو اړوند المسیره ټلویزیون هغه انځورونه خپاره کړل چې د دوی په وینا د بندر پر وړاندې د "امریکايي برید" لومړني انځورونه دي. په دې انځورونو کې د اور لویه لمبه لیدل کېږي چې د کښتیو شاوخوا سیمه یې روښانه کړې، او د لوګي غټې ستنې پورته کېږي.

انیس الاصبحي وویل: "د ملکي دفاع ژغورنې ډلې او امبولانسونه هڅه کوي چې قربانیان ومومي او اور مړ کړي."

حوثیانو له هغه وخت راهیسې په منظم ډول پر اسرائیلو توغندي او ډرون بریدونه کړي، کله چې تل ابیب د ۲۰۲۳ کال په اکتوبر کې په غزه کې خپل وحشیانه جګړه پیل کړه.

د اسرائیلو پوځ د جمعې په ورځ په ټیلیګرام کې وویل: "له هغه وروسته چې څو شېبې وړاندې په اسرائیلو کې د خطر زنګونه ووهل شول، له یمن څخه توغول شوی یو توغندی شنډ شو." هغوی زیاته کړه چې د هوايي دفاع سیستمونه د دې ګواښ د شنډولو لپاره ځای پر ځای شوي دي.

د حوثیانو بریدونو د سویز کانال له لارې د کښتیو تګ راتګ اغېزمن کړی دی، چې دا یوه حیاتي لاره ده او د نړۍ د سمندري ټرافیک شاوخوا ۱۲ سلنه برخه پکې ترسره کېږي. دې حالت ډېری شرکتونه اړ کړي چې د سویلي افریقا له لارې اوږده او ګران سفرونه وکړي.

امریکا د ولسمشر جو بایډن د ادارې په وخت کې د حوثیانو پر وړاندې بریدونه پیل کړل، او د هغه ځای ناستي ولسمشر ډونالډ ټرمپ ژمنه کړې چې پوځي عملیات به تر هغه دوام وکړي څو چې هغوی د کښتیو لپاره نور ګواښ نه وي.

د پنجشنبې په ماښام د فرانسې د دفاع وزیر سباستین لیکورنو وویل چې د فرانسې یوې جنګي بېړۍ په سره سمندر کې له یمن څخه توغول شوی ډرون ویجاړ کړ.

هغه په ایکس کې وویل: "زموږ وسله وال ځواکونه د سمندري تګ راتګ د آزادۍ د خوندي کولو لپاره خپلې هڅې جاري ساتي."