د پاکستان په دغه تر ټولو لوی ښار کې چاودنې لږترلږه ۱۶ کسان وژلي، چې ښځې او ماشومان هم پکې شامل دي؛ ژغورونکي لا هم تر خاورو لاندې د پاتې کسانو په لټه کې دي.

د چارواکو په وینا، د پنجشنبې په ورځ د پاکستان په کراچۍ ښار کې په یوه اپارتماني ودانۍ کې د ګازو یوې چاودنې لږترلږه ۱۶ کسان وژلي او یو شمېر نور یې ټپیان کړي دي.

د سند ایالت د پلازمینې کراچۍ د پولیسو مشر، رضوان پټېل وویل چې دغه چاودنه په یوه استوګنیزه سیمه کې شوې ده. دا پېښه د کراچۍ په "سولجر بازار" (Soldier Bazaar) سیمه کې د سهار شاوخوا ۴:۰۰ بجې هغه مهال رامنځته شوه، چې مسلمانو کورنیو د روژې د پېشلمي لپاره تیاری نیوه.

پټېل زیاته کړه چې ژغورونکي لا هم د خاورو او ویجاړو شویو برخو په لیرې کولو بوخت دي ترڅو هغه کسان وژغوري چې ښايي تر خاورو لاندې بند پاتې وي. هغه د نورو جزییاتو په اړه څه ونه ویل خو ټینګار یې وکړ چې د لټون او ژغورنې عملیات دوام لري.

په کراچۍ او د پاکستان په نورو برخو کې ډېری کورونه او اپارتمانونه د پخلي لپاره طبیعي ګاز کاروي. خو د ګازو د فشار د ټیټوالي له امله ډېرې کورنۍ د اوبلن پټرولیم ګاز (LPG) له (سلنډرونو) څخه هم استفاده کوي.

د یادونې وړ ده چې د تېر کال په جولای میاشت کې هم د پاکستان په پلازمېنه اسلام اباد کې په یوه کور کې د واده له مراسمو وروسته د ګازو چاودنې د ناوې او زوم په ګډون اته کسان وژلي وو.