د اسرائیلو لومړي وزیر بنیامین نتنیاهو د جمعې په ورځ د الخلیل ښار د "سمدستي تړلو" امر وکړ او امنیتي ځواکونو ته یې لارښوونه وکړه چې په ټوله اشغال شوې لوېدیځه غاړه کې د یوه "بشپړ ټولبند" لپاره چمتووالی ونیسي.

دا ګام وروسته له هغه پورته شو چې د لوېدیځې غاړې په سویل کې د الخلیل اړوند حلحول ښارګوټي ته څېرمه په یوه وسله وال برید کې پنځه غیرقانوني اسرائیلي ښارګوټو اوسیدونکي ټپیان شول او د اسرائیلي پوځ په ډزو کې دوه فلسطینیان ووژل شول.

نتنیاهو په یوه بیان کې وویل: "ما د اسرائیلو پوځ او امنیتي ادارو ته لارښوونه وکړه چې سمدستي پر الخلیل بندیز ولګوي او له نن (جمعې) څخه په یهودا او سامره (لوېدیځه غاړه) کې د یوه پراخ ټولبند لپاره چمتووالی ونیسي."

نوموړي وویل چې هغه د لوړپوړو دفاعي او امنیتي چارواکو سره چې د پوځ لوی درستیز او د شین بېټ  او ملي امنیت شورا مشران پکې شامل وو، یوه امنیتي ارزونه ترسره کړې ده.

د «کان» (KAN) شبکې راپور ورکړ چې د پوځ لوی درستیز، ایال ضمیر د راپور شویو ډزو وروسته د الخلیل او شاوخوا کلیو ګردچاپېره د امنیتي کمربند جوړولو منظوري ورکړې ده.

په سیمه کې عیني شاهدانو انادولو اژانس ته ویلي چې اسرائیلي ځواکونو د الخلیل ښار ټولې دروازې په اوسپنیزو دروازو تړلې او ښار یې کلابند کړی دی.

د اسرائیلو پوځ د خاورینو خنډونو او پوځي پوستو په جوړولو سره د ښارګوټو او د استوګنې سیمو دروازې تړلې دي او د هغوی ترمنځ یې د تګ راتګ مخه نیولې ده.

شاهدانو زیاته کړې چې اسرائیلي ځواکونو د الخلیل ښار پر څنډو او څو شاوخوا ښارګوټو چاپې وهلي، هټۍ یې تلاشي کړي او د څارنیزو کامرو ویډیوګانې یې له ځانه سره وړي دي.

دا پرمختګونه د اکتوبر په ۲۷مه د اسرائیلو د پارلماني ټاکنو په درشل کې رامنځته کېږي.

اشغال شوې لوېدیځه غاړه او ختیځ بیت المقدس، له هغه مهال راهیسې د اسراییلي پوځي بریدونو او د غیرقانوني مېشتېدونکو د تاوتریخوالي د پراخېدو شاهدان دي چې اسراییلو د ۲۰۲۳ کال په اکتوبر میاشت کې پر غزې خپله نسل وژونکې جګړه پیل کړه.

په دغو بریدونو کې د فلسطینیانو وژل او نیول، د کورونو او نورو ودانیو ړنګول، د جوماتونو او نقلیه وسایطو سوځول، د کرنیزو ځمکو ویجاړول، خپلو کروندو ته د بزګرانو د لاسرسي مخنیوی، د فلسطینیانو بې ځایه کول، او د غیرقانوني مېشت ځایونو پراختیا شامل دي.