د استانبول د ښاروالۍ ښاروال اکرم امام اوغلو د چهارشنبې په ورځ له توقیف وروسته په ښاروالۍ کې د فساد د تحقیقاتو د یوې برخې په توګه زنداني شو.

د استانبول د لوی څارنوال دفتر په خپل رسمي بیان کې لاندې څرګندونې وکړې:

"زموږ د لوی څارنوالۍ دفتر لخوا ترسره شوو تحقیقاتو په چوکاټ کې، د جنایي محکمې قاضي پریکړه کړې چې شکمن اکرم امام اوغلو د جرمي سازمان د جوړولو او اداره کولو، رشوت اخیستلو، زور زیاتي، په غیرقانوني ډول د شخصي معلوماتو ثبتولو او د مالي تحقیقاتو په چوکاټ کې د داوطلبۍ د درغلۍ په جرمونو کې د زنداني  کولو حکم وکړ."

خو، محکمې وویل چې د ترهګرۍ د تحقیقاتو په چوکاټ کې د امام اوغلو په رسمي ډول د نیولو اړتیا نشته.

"د شکمن اکرم امام اوغلو په اړه، که څه هم د یوې وسله والې ترهګرې ډلې سره د مرستې کولو قوي شک شتون لري، خو لا دمخه د مالي جرمونو له امله د هغه د نیول کیدو له امله ، په دې مرحله کې دا اړینه نه ګڼل کیږي چې پدې قضیه کې زنداني شي چې د همدې امله  غوښتنه رد شوې ده."

د استانبول د لوی څارنوال دفتر، د امام اوغلو او ۹۹ نورو شکمنو کسانو په اړه؛ د جرمي سازمان د جوړولو او مدیریت، په جرمي سازمان کې د غړیتوب، اختلاس، رشوت، وړ درغلۍ، د شخصي معلوماتو غیرقانوني ترلاسه کولو او په عامه داوطلبۍ کې د درغلیو په اړه تحقیقات پیل کړل.

د پولیسو په مرکز کې د دوی د پروسیجرونو وروسته، ډیری شکمن کسان د استانبول د چاغلیان محکمې ته راجع شول.

د PKK/KCK ترهګریز سازمان سره د تړاو ادعا

امام اوغلو هم په دې تورن دی چې د "ښاري اجماع" په نوم په یوه نوښت کې ښکیل دی، چې ادعا کیږي هدف یې په ښاري سیمو کې د PKK/KCK ترهګریز سازمان نفوذ زیاتول دي.

محکمې د امام اوغلو د نیولو حکم ورکړ، چا چې د جمعې او شنبې په ورځو د استانبول د پولیسو په څانګه کې د فساد د تورونو په اړه بیان ورکړ.

امام اوغلو وروسته د نورو پوښتنو لپاره د استانبول د لوی څارنوال دفتر ته واستول شو او د ۹۹ نورو شکمنو کسانو سره په محکمه کې حاضر شو.

د استانبول د ښاروالۍ د فرعي شرکت میدیا اس رئیس او د امام اوغلو سلاکار، مراد اونګون، او د امام اوغلو ساختماني شرکت عمومي مدیر تونجای یلماز هم د تحقیقاتو په جریان کې د نیول شویو کسانو په ډله کې  دي.

امام اوغلو او نورو شکمنو کسانو په هغوې لګیدلي  تورونه رد کړي  دي.