د امریکا د بهرنیو چارو وزیر مارکو روبیو ویلي، د بریتانیا یوې پوځي اډې ته څېرمه، چې د امریکا له خوا کارول کېږي، په یوه شکمنه دسیسه کې د "یوه بهرني اړخ لاس" دی.

روبیو فاکس نیوز ته په خبرو کې وویل چې د انګلستان په سویل لوېدیځ کې د فیرفورډ په (RAF) پوځي اډه کې د اوونۍ د پای پېښه "یو ډېر جدي وضعیت" و او په ډاګه یې کړه چې په راتلونکو ورځو کې ښايي د شکمنې بهرنۍ ښکېلتیا په اړه نور معلومات هم راڅرګند شي.

هغه وویل: "ځینې شیان شته چې زه یې د ډېرو بېلابېلو دلیلونو له مخې د رسنیو له لارې نه شم ویلای."

"یوازې دومره ویل کافي دي چې د اوونۍ په پای کې په بریتانیا کې څه وشول، څه نږدې وو چې وشي، یا څه کېدای شول، دا یو ډېر جدي وضعیت دی. دا هغه قضیه ده چې په ښکاره ډول د یوه بهرني اړخ لاس پکې دی."

دا څرګندونې وروسته له هغه مخې ته راځي چې د بریتانیا د ترهګرۍ ضد پولیسو د یکشنبې په ورځ په ګلوسټرشایر کې د شاهي هوایی ځواک (فیرفورډ) اډې ته څېرمه پنځه کسان ونیول.

دا کسان چې ټول یې د لندن اوسېدونکي او عمرونه یې د شلو کلونو په لومړیو کې دي، وروسته له هغه ونیول شول چې یوه سیمه ییز بزګر چارواکو ته خبر ورکړ چې درې سپین وین موټر یې لیدلي چې د اډې پر لور روان وو.

پولیسو د دوشنبې په ورځ وویل چې دوی په دې اړه څېړنه کوي چې ایا د یوه بهرني دولت په استازیتوب عمل کوونکي کسان پدې کې ښکېل وو که نه. پنځه واړه شکمن کسان وروسته په ضمانت خوشې شول، خو څېړنې لا هم روانې دي.

د فیرفورډ اډه (RAF Fairford) د امریکا د پوځ لخوا کارول کیږي او د امریکا هغه بم غورځوونکې الوتکې پکې ځای پر ځای دي چې په سیمه کې په عملیاتو کې برخه اخلي.

روبیو د څېړنو پر مهال له امریکا سره د همکارۍ له امله د بریتانیا د چارواکو ستاینه وکړه.

هغه وویل: "زه غواړم د بریتانیا له چارواکو مننه وکړم، چې ډېر همکار وو او پر چارو بشپړ مسلط دي،" هغه زیاته کړه چې امریکایي چارواکي د نیونو او وروسته په ضمانت د خوشې کېدو په اړه له بریتانوي چارواکو سره په اړیکه کې دي.

روبیو همدارنګه دا پېښه په بهر کې د امریکا د ګټو پر وړاندې د ګواښونو په پراخ چوکاټ کې یاده کړه. هغه په ځانګړې توګه ایران ته اشاره وکړه او ویې ویل چې ایراني اړخونو په ښکاره ډول په نړیواله کچه د امریکا ګټو ته ګواښونه کړي او امریکا دا ډول ګواښونه جدي بولي.

هغه وویل: "موږ په نړۍ کې له داسې عناصرو سره مخ یو، د بېلګې په توګه د ایران په قضیه کې، چې په ښکاره ډول یې په نړیواله کچه پر امریکایي ګټو د برید ګواښ کړی دی. موږ به تل دا مسایل ډېر جدي نیسو."

د دوشنبې په ورځ، د امریکا ولسمشر ډونالډ ټرمپ وویل چې د بریتانیا پولیسو باید دا پنځه کسان په ضمانت نه وای خوشې کړي.

ټرمپ زیاته کړه چې دا قضیه ښایي له ایران سره تړاو ولري، خو د نورو جزیاتو له ورکولو یې ډډه وکړه.

ټرمپ په اوول دفتر (سپینه ماڼۍ) کې خبریالانو ته وویل: "زه حیران یم چې هغوی یې خوشې کړل، ما به دا کار نه وای کړی." نوموړي په ورته وخت کې زیاته کړه چې بریتانوي چارواکو له امریکا سره "ډېر نږدې" کار کړی دی.

هغه زیاته کړه: "موږ د هغوی په اړه هر څه پوهیږو. موږ به هغوی نه وای خوشې کړي."